Հարկային օրենսգիրքը ընդունվեց. կա՞ն այսպիսի հրատապությամբ այլ նախագծեր, որոնք պետք է օր առաջ քննարկել: «Առաջին լրատվական»-ի հետ զրույցում, ի պատասխան այս հարցի, ԱԺ ֆինանսավարկային և բյուջետային հարցերի մշտական հանձնաժողովի նախագահ, «Լուսավոր Հայաստան» խմբակցության պատգամավոր Մանե Թանդիլյանը նշեց. «Նախևառաջ Հարկային օրենսգրքի փոփոխությունների ընդունման հետ կապված մտահոգություններ կան առ այն, որ ուժի մեջ մտնելու ժամկետները խախտված են: Ես մի քանի ճշտող և հաստատող նամակներ եմ ուղարկել արդարադատության նախարարին: Արտահերթ նստաշրջաններին ես դեմ եմ. սա վատ աշխատանքի հետևանք է: Արտահերթ նստաշրջանով կարևոր նախագծերը, այդ թվում նաև Հարկային օրենսգիրքն անցկացնելն անթույլատրելի է: Հարկային օրենսգիրքի ուժի մեջ մտնելու ժամկետը փոփոխվել է, իսկ օրենքում գրված է հունվարի 1»:
Մ. Թանդիլյանի կարծիքով՝ ակցիզային հարկի բարձրացումը հանգեցնելու է անհարկի և չհիմնավորված թանկացումների շղթայի:
«Կարծում եմ դեռ չենք էլ մոտեցել Հարկային օրենսգրքի ամբողջական փոփոխություններին՝ տեսլականի, մոտեցումների և սկզբունքների փոփոխություններին, ինչը պետք է բերի տնտեսական աճի: Թվաբանական փոփոխություններով առաջ չենք կարող գնալ: Մեկ տարի քննարկվում էր Հարկային օրենսգիրքը: Հարկային օրենսգրքի հետևում կա թիմ, որը նախկինում գրել է այն, և ինչպես ենք պատկերացնում փոփոխություն մի թիմի կողմից, որը դրա հեղինակն է, կարծում եմ՝ նոր մոտեցումներ էին պետք. նոր Հարկային օրենսգիրք՝ նոր մոտեցումներով: Բարելավող դրույթներ, իհարկե, կան, բայց այս ՀՕ-ն դեռևս այն փաստաթուղթը չէ, որով Հայաստանում պետք է տնտեսական թռիչք ապահովվի»:
Մանրամասն՝ տեսանյութում:
