Մոտ մեկ ամիս առաջ «Հրապարակ» օրաթերթը տեղեկություն էր հրապարակել այն մասին, որ Բելգիայում ապաստանած, ՀԺԿ նախկին անդամ Գրիշա Վիրաբյանը կալանավորվել է:
Թերթի տեղեկությունների համաձայն ՝ Վիրաբյանից տուժած 35-40 տարեկան տղամարդու կյանքը դժվարությամբ, բայց փրկել են: Վերջինիս իբր թե երկու անգամ վիրահատել են: Գրիշա Վիրաբյանը, հրապարակման համաձայն, դանակահարել է Ա. Ա.-ին՝ իբր իրեն «մեր քրֆելու համար»:
«Առաջին լրատվական»-ին ուշագրավ մանրամասներ է հայտնի դարձել միջադեպից: Պարզվում է, որ Վիրաբյանի «զոհը» Բելգիայում ապօրինի բնակվող Արմեն Ալաջանյանն է, որը օրեր առաջ մեկ այլ թեմայով «Առաջին լրատվական»-ին հարցազրույց էր տվել: Արմեն Ալաջանյանը մեզ պատմել էր, թե իբր ստամոքսի ետնամասում քաղցկեղ ունի և օրեր առաջ է դուրս գրվել հիվանդանոցից, ու եթե ապօրինի բնակվող մյուս հայերի նման իրեն էլ ետ ուղարկեն Հայաստան՝ ինքն այստեղ կմահանա:Վերջինս չէր նշել, սակայն, որ իբր իրեն այնտեղ դանակահարել է Վիրաբյանը:
Հատուկ «Առաջին լրատվական»-֊ին ուղարկած նամակում Վիրաբյանը պատմում է, թե ինչ մեղադրանքով է ինքը հիմա կալանավորված: Ներկայացնում ենք նրա նամակից մի հատված՝ ամբողջությամբ կարող եք կարդալ մեր լուսանկարներում: Վիրաբյանը կտրականապես հերքում է իրեն մայր հայհոյելու հանգամանքը և նշում, որ այդ գործն իր գլխին պարզապես սարքվել է այլ պատճառներով:
«Եթե որևէ մեկը փորձի վիրավորել իմ ծնողին, իր արժանի պատիժը կստանա: Ամեն մարդ իր արարքների պատիժը կստանա, հարազատներին կեղտոտ գործարքների կամ այլ քաղաքական գործարքների մեջ խառնելն ու օգտագործելը անբարոյականություն է: Հայտարարում եմ՝ Արմեն Ալաջանյանը ինձ մայր չի հայհոյել և, առավել ևս, իմ առաջ չի հայտարարել նման բան, որ ես էլ իրեն դանակահարեի: Նա հեռուն գնացող քաղաքական նպատակ ունի. կեղծ մեղադրանքներ ներկայացնելով՝ փորձում է զոհի կարգավիճակ ստանալ ու փող կորզել և միաժամանակ Բելգիայում ապաստան ստանալ ու մեկնել Ամերիկա: Իր հետ կատարված կեղծ մահափորձի պատասխանատվությունը, ինչպես նաև բազմաթիվ այլ հանցանքների ու կատարած գողությունների պատասխանատվությունը կրում և կրելու է ինքը ու իր կողքին կանգնած թափթփուկները, որոնք էլ կազմակերպել են այս սադրանքը:
Հստակ ու պատասխանատու ասում եմ և հետագայում իր ցուցմունքներն էլ ցույց կտամ, որտեղ նա ասում է, որ ես՝ Գրիշա Վիրաբյանս, կապ ունեմ Հայաստանի բարձրագույն քաղաքական իշխանության հետ և նրա պատվերով ուզում եմ Արմեն Ալաջանյանին սպանել, քանի որ նա վտանգ է ներկայացնում Հայաստանի գործող իշխանություններին: Ցուցմունքի մեջ հստակ երևում է, որ ես՝ որպես հատուկ հանձնարարություն կատարող, չէի կարող սպանել քեզ քո ընդդիմադիր լինելու համար, մայր հայհոյելը ուղղակի պատրվակ ու պատճառ է իմ իսկական նպատակին հասնելու համար:
Մեկ անգամ ևս հայտարարում եմ, որ ես նրա դեմ մահափորձ չեմ կատարել ու կազմակերպել և Հայաստանի գործող իշխանության հետ էլ կապ չունեմ:
Արմեն Ալաջանյանի համար շատ ցանկալի ու նպատակային դանակահարությունը կատարվել ինձ անհայտ տեղում և ժամանակ, և միայն իրեն է հայտնի, թե ով է օգնել իրեն:
Ես կիսատ գործ չեմ թողնում, եթե ես ուզենայի իրեն սպանել, մանավանդ եթե իմ «հարազատ» իշխանությունն է պատվիրատուն, ապա մի քանի անգամ կխփեի ու այդպես խնամքով ու նպատակային չէի շոյի իրեն»:
Զավեշտալի է Գրիշա Վիրաբյանին Հայաստանի իշխանությունների հետ գործարքի գնալու մեղադրանքը, հատկապես երբ հայտնի է, որ վերջինս Հայաստանից արտագաղթել է երկրորդ նախագահի օրոք և Սերժ Սարգսյանի կողմից նշանակված Երևանի ոստիկանապետի կողմից խոշտագումների ենթարկվելուց հետո:
Գրիշա Վիրաբյանին խոշտանգելու հանգամանքն, ի դեպ, ընդունել և Հայաստանի Հանրապետությունից դրա համար փոխհատուցում է պահանջել Մարդու իրավունքների եվրոպական դատարանը:
