«Հրապարակը» գրում է. «Արդեն մի քանի ամիս է՝ Գյումրու քաղաքապետարանի մշակույթի բաժնի պետ Ատաշես Կարապետյանը, որն ԱԺ պատգամավոր Նաիրա Կարապետյանի հայրն է, գալիս է գործի, բայց մեկուսացված է աշխատանքից:
Քաղաքապետը նրան ոչ մի հանձնարարություն չի տալիս՝ ամեն կերպ ցույց տալով, որ աշխատանքից հեռացման դիմում գրի: Այս պատմությունը քաղաքում բոլորը գիտեն: Բանը հասել է նրան, որ մշակույթի բաժնի պետի պարտականությունները դրվել են նոր աշխատողի՝ Հարություն Սաֆարյանի վրա, որին քաղաքապետարանում ժամանակավոր պաշտոնակատար են համարում: Ըստ քաղաքապետի մամուլի քարտուղարի, նման բան չկա, և բաժնի պետ մնում է Արտաշես Կարապետյանը, իսկ Սաֆարյանի գալով՝ ուղղակի ծանրաբեռնվածության վերաբաշխում է կատարվել:
Քաղաքապետի և մշակույթի բաժնի պետի միջև ծայր առած լարվածության պատճառների մասին տարբեր վարկածներ են շրջում: Պատմում են, որ այն սկսվել է ԲՀԿ առաջնորդ Գագիկ Ծառուկյանի Գյումրի այցելությունից: Արտաշես Կարապետյանը Լենինական հանրապետականի կրծքանշանով է բեմ բարձրացել և դրանով, իբր, զայրացրել է Ծառուկյանին: Մյուս վարկածի համաձայն, Գյումրու քաղաքապետին զայրացրել է այն, որ մշակութային միջոցառումներից մեկի ժամանակ Կարապետյանը գովել է նախկին քաղաքապետին:
… Իսկ գյումրեցիներն ուշի ուշով հետևում են նրա և քաղաքապետի պայքարին: Նույնիսկ հաշվել են, թե քանի հանրապետական է գործից հանել Սամվել Բալասանյանը, ասելով. «Եթե կարողանա Արտաշին ազատել, սա կլինի 173-րդ ազատված հանրապետականը»:
