Հունիսի 27-ին Երևանում տեղի է ունեցել Հայաստանի Հանրապետության և Վրաստանի միջև առևտրատնտեսական համագործակցության միջկառավարական հանձնաժողովի 10-րդ նիստը: Հայկական կողմից նիստը համանախագահել է ՀՀ փոխվարչապետ Տիգրան Ավինյանը, վրացական կողմից` Վրաստանի փոխվարչապետ, տարածքային զարգացման և ենթակառուցվածքների նախարար Մայա Ցկիտիշվիլին:
Նիստի ընթացքում քննարկվել է հարցերի լայն շրջանակ՝ ներառյալ էներգետիկայի, տրանսպորտի, գյուղատնտեսության, զբոսաշրջության, հումանիտար և բազմաթիվ այլ ոլորտներին վերաբերող հարցեր։ Նիստի ավարտին տեղի է ունեցել Հայաստանի Հանրապետության և Վրաստանի միջև առևտրատնտեսական համագործակցության միջկառավարական հանձնաժողովի 10-րդ նիստի արձանագրության ստորագրման արարողությունը: Արձանագրության մեջ արտացոլված են երկու կառավարությունների այն հիմնական անելիքները, որոնք անհրաժեշտ հիմք կհանդիսանան երկկողմ տնտեսական հարաբերություններին նոր որակ հաղորդելու համար։ Հատկանշական է այն հանգամանքը, եր վերջին անգամ նման ձևաչափով նիստ անցկացվել է 8 տարի առաջ։
Վրաց քաղաքագետ Գելա Վասաձեի կարծիքով՝ նման միջոցառումները չափազանց կարևոր են. «Միջկառավարական հանձնաժողովը գոյություն ունի, որպեսզի հեշտացնի այն մարդկանց կյանքը, որոնք բիզնեսով են զբաղվում, միմյանց հյուր են գնում և ում պարզապես հետաքրքիր են մեր երկրները։ Հարցերը քիչ չեն և դրանք պետք է լուծում ստանան, բայց եթե անկեղծ ասեմ՝ ամենակարևորն այն է, որ չխանգարեն»-«Առաջին լրատվական»-ի հետ զրույցում ասաց նա։
Ուրիշ ի՞նչ ուղղություններով է հնարավոր զարգացնել երկկողմ համագործակցությունը հարցին ի պատասխան, մեր զրուցակիցն ասաց.«Միջկառավարականն ընդհանրապես ուղղություն չէի համարի, այն օժանդակող գործիք է։ Մնացած ամեն ինչ որոշվում է մարդկանց հարաբերությունների հիման վրա։ Կրկնեմ՝ կարևորը, որ կառավարությունները չխանգարեն, իսկ եթե օգնեն՝ ուրեմն խոնարհվենք, շատ շնորհակալություն»։
Վրաց-ռուսական լարված դիմակայությանև փոխհարաբերությունների պատճառով ՌԴ նախագահ Պուտինը մի շարք «պատժամիջոցներ» սահմանեց ընդդեմ Վրաստանի։ Արդյոք կհասնի խնդիրը նաև Վերին Լարսին, Մոսկվան կգնա՞ այդ քայլին, հարցին ի պատասխան, Վասաձեն պատասխանեց.«Եթե ռուսական կողմը այդ խնդիրներն առաջացնի, ապա, անկասկած, հնարավոր է։ Վրացական կողմից երբևե որևէ խնդիր չի եղել։ Տարօրինակ է, որ ռուսական մամուլում հաճախ կոչեր են հնչում առհասարակ խզել Վրաստանի հետ հարաբերությունները։ Իսկ Հայաստանի կողմից որևէ առարկություն այդ կոչերի հետ կապված ես չեմ լսել, բայց չէ՞ որ դա շատ ուղիղ ձևով վերաբերում է նաև Հայաստանին, այնպես չէ՞»։