ՀՀ պաշտպանության նախարարի մամուլի քարտուղարը հայտարարել է, որ Ռուսաստանում տեղի ունեցած «Բանակ 2019» ռազմաարդյունաբերական ցուցահանդեսի շրջանակում Հայաստանը կնքել է Ռուսաստանից հարձակողական ժամանակակից սպառազինություն ձեռք բերելու մասին համաձայնագրեր։ Մանրամասները հայտնի չեն։ Հայաստանը վճարումը կատարելու է կանխի՞կ, թե՞ վարկով՝ նույնպես հայտնի չէ։
Ինչպես հայտնի է՝ պաշտպանության նախարար Դավիթ Տոնոյանը նույնպես հայտարարել է, որ Հայաստանը փոխանցել է բազմաֆունկցիոնալ Սու-30 ռազմական 4 ինքնաթիռների գումարը, որոնք Հայաստանում կլինեն 2020 թվականի սկզբին։ Հետևաբար պարզ է, որ խոսքը այս կործանիչների մասին չէ։ Ի՞նչ հնարավոր սպառազինության մասին կարող է խոսք գնալ «Առաջին լրատվական»-ի հարցին ռազմաքաղաքական վերլուծաբան Մհեր Հակոբյանը պատասխանեց․ «Տվյալ դեպքում սպառազինության կոնկրետ ցանկը մոտակա տարիներին մենք դժվար էլ իմանանք, քանի որ սա վերաբերում է մեր երկրի կենսական անվտանգության հարցին, և, բնականաբար, մեր հակառակորդը որսում է ամեն մի տեղեկատվություն։ Այս պայմաններում մենք պետք է շատ զգույշ տեղեկատվությունը դուրս տանք»։
Մհեր Հակոբյանը նաև հավելեց․ «Արդեն մեծ է հավանականությունը, և գործնականում մեծ է այն փաստը, որ 4 հատ Սու-30 ռազմական ինքնաթիռները երևի 2019 թվականի վերջին կամ 2020 թվականի սկզբին կլինեն Հայաստանի Զինված ուժերի կազմում։ Ես ենթադրում եմ, որ երևի 2020 թվականի վերջին կամ 2021 թվականի սկզբին մենք ևս 8 հատ կստանանք, քանի որ Սու-30 ռազմական ինքնաթիռները իրենց կոմպլեկտի մեջ 12 հատով են հանդես գալիս։ Այսպիսով` կունենանք մեկ էսկադրիլիա, որը մեր բանակի համար կունենա հսկայական նշանակություն և կազդի բանակի մարտունակության վրա։ Ես ինքս եմ բազմիցս ընդգծել, որ, այո՛, կարևոր է օդուժը, բայց չի կարելի այս մի ձեռքբերումով չափից ավելի ոգևորվել, որովհետև չի կարելի այն բացարձականացնել և հույս ունենալ, որ միայն դրանով կհասնես հաջողության»։
Մանրամասները՝ տեսանյութում։