«Մենք պատկերացնում ենք, որ Սփյուռքի գործերով հանձնակատարը ավելի շատ ժամանակ է անցկացնելու հենց Սփյուռքի մեր համայնքներում՝ ներսից ճանաչելով և հասկանալով Սփյուռքի հետ տարվող քաղաքականության էությունը և բովանդակությունը և ոչ թե կառվարության նիստերին է մշտապես ներկա լինելու: Խոսքը բացառապես մոդելի փոփոխության մասին է, ոչ թե Հայաստան-Սփյուռք հարաբերությունների բովանդակության ու փիլիսոփայության: Այս փոփոխություններից հետո այդ հարաբերություններն առավել բարձր մակարդակի վրա են դրվելու»,- «Առաջին լրատվական»-ի հետ զրույցում այս մասին ասաց Սփյուռքի նախկին նախարար, Աժ Գիտության, կրթության, մշակույթի, Սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը: Նա վստահեցրեց, որ Զարեհ Սինանյանը վայելում է թիմի համակրանքը և աջակցությունը, և հույս հայտնեց, որ նա լավագույնս կաշխատի, որպեսզի ձևավորվի ինստիտուտ-կառույց, և Սփյուռքի հետ տարվող քաղաքականությունը մեկ անձից կախված չի լինի:
Անդրադառնալով դիտարկմանը, որ լինելով կուսակցության երիտասարդ անդամ՝ ընտրվել է ՔՊ վարչության անդամ, իսկ Սասուն Միքայելյանը չի ընտրվել, Մ. Հայրապետյանը նշեց. «Ինձ համար զարմանալի չէր, ենթատեքստ չպետք է փնտրել կատարվածում, վարչության կազմը՝ 21 հոգին ընդամենը արտացոլում են ընտրություններին մասնակցած 350 պատվիրակների կամքը, իմ և Ս. Միքայելյանի ստացած ձայների միջև տարբերությունը ընդամենը 15 է, մեծ մրցակցություն է եղել: Այստեղ դավադրություն փնտրելը անլուրջ խոսակցություն է»:
«Երբ հարց են տալիս, թե Վահե Գրիգորյանը ՍԴ նախագահ է, թե ոչ, սա, կարծում եմ, քաղաքական ցուգցվանգային իրավիճակ է. յուրաքանչյուր պատասխան նոր հարցեր է առաջացնելու: Ես սույն խնդիրը բացառապես քաղաքական համատեքստում եմ դիտում,- նշեց մ. Հայրապետյանը:- Հրայր Թովմասյանը ինձ համար, որպես քաղաքացի, ՍԴ նախագահ չէ 2018թ. ապրիլի 23-ից հետո: Ապրիլի 23-ին միայն Սերժ Սարգսյանը չէր մերժվել, նա արատավոր, նեխած համակարգի խորհրդանիշն էր: Բազմահազարանոց ցույցերի և հեղափոխության ժամանակ քաղաքացին դուրս եկավ փողոց՝ մերժելով նաև Հրայր Թովմասյանին»:
Մանրամասն՝ տեսանյութում:
