«Իրատես» թերթը գրում է. «Չնայած «Իմ քայլը» խմբակցության անդամներն աջ ու ձախ դաս են տալիս և ընդդիմախոսներին, և լրագրողներին, սակայն դրանից նրանց բարեկրթությունը չի ավելանում։
Վերջին նիստի ժամանակ, երբ ԱԺ նախագահ Արարատ Միրզոյանի նախագծի շուրջ քննարկումները բուռն ընթացան, «Իմ քայլը» խմբակցության անդամ, գյումրեցի Նազելի Բաղդասարյանը հայտարարեց, թե ընդդիմության «ախորժակը գնալով մեծանում է»։ Սա վրդովեցրեց ընդդիմադիրներին, սակայն Բաղդասարյանը, դիմելով ԲՀԿ-ին ասաց, թե ինքը շատ լավ գիտի՝ ով որ մարզում ինչքան է կերել։ Պատգամավորից հետաքրքրվեցի, թե ինչո՞ւ են «Իմ քայլի» անդամները վրդովվում, երբ ընդդիմությունը քննադատում է։
«Եթե քննադատությունը հիմնված է փաստերի վրա, նորմալ է։ Երբ կոնտեքստից կտրված բառեր են մատուցվում, դա որակավորում է դիտվում, իհարկե, անընդունելի է։ Առավել ևս, որ դա անում է երկրի թիվ մեկ ամբիոնից պատգամավորը»։
Դուք ասացիք, թե գիտեք ով որքան է մարզերում կերել, կարո՞ղ եք փաստ ներկայացնել, հակադարձեցի։ Գյումրեցի պատգամավորը առանց անուն տալու ակնարկեց, որ Գյումրիում է ապրում նաև ընդդիմության այն ներկայացուցիչը, որը վերջին 4-5 նիստերին չի ներկայանում, ով Գյումրու նախկին քաղաքապետ էր։ Խոսքը ԲՀԿ խմբակցության անդամ Վարդան Ղուկասյանի մասին է։
Ի դեպ, վերջինս տարբեր հարցազրույցներում փաստել է, որ իր ղեկավարման տարիներին հայրաքաղաքը զարգացել է։ Այս առումով Նազելի Բաղդասարյանը չցանկացավ մեկնաբանություն տալ՝ ընդգծելով, որ դա իրականությանը բացարձակ չի համապատասխանում»:
Առավել մանրամասն՝ թերթի այսօրվա համարում:
