Եվրոպայի Հայ դատի գրասենյակի հասարակայնության հետ կապերի պատասխանատու Պետո Դեմիրճյանը, «Առաջին լրատվական»-ի հետ զրույցում անդրադառնալով ԵՄ կողմից Ուկրաինայի հանդեպ դիրքորոշմանը, նշեց, որ թեպետ իրենք անմիջականորեն Ուկրաինայի իրադարձությունների վերաբերյալ խոսելու իրավասություն չունեն, միջամուխ չեն այդ հարցին, սակայն կարող է նշել միայն, որ նախորդ շաբաթ լիագումար նիստի ընթացքում ինչ-որ բանաձևեր որդեգրվեցին եվրոպական խորհրդարանի կողմից, իսկ եկող շաբաթ պիտի խոսվի Ռուսաստանի դեմ, հատկապես՝ Մագնիցկու կացության պատասխանատուների դեմ միջոցառումներ անելու համար:
«Մենք հետևում ենք, բայց մանրամասնորեն մեր աշխատանքի ծիրի մեջ չէ այս մեկը, դրանից ավել ոչինչ չենք կարող ասել»,- մանրամասնեց նա: Հարցին՝ ստեղծված իրադրության մեջ արդյոք Հայաստանը ճի՞շտ դիրք է բռնել, չեզոքությունն արդարացվա՞ծ է այս դեպքում, Դեմիրճյանը պատասխանեց, որ այս դեպքում ճիշտ ու սխալի հարց չկա, հասկանալի է, որ Հայաստանը պետք է գոնե առայժմ այսպես գնա:
«Գիտենք՝ կացությունն ինչ է, ճիշտ դրա համար է, որ մենք հայտարարություններ, որևէ տեսակի կոչեր կամ հաղորդագրություններ չենք տվել, այսինքն՝ մենք էլ շատ զգույշ ենք՝ հարցի չափազանց նուրբ և զգայուն լինելը հաշվի առնելով: Բնականաբար, հասկանալի է՝ ամեն մեկս ունենք մեր առանձին կարծիքը, որ կուզեինք արտահայտել, բայց ամեն պարագայում՝ ներկա պայմանների բերումով այս քաղաքականությունն է ճիշտը, և հենց դրանից ելնելով է, որ որևէ բան չենք արել և անշուշտ չենք անելու այս հարցով»,- ասաց նա:
Հարցին՝ Ուկրաինայում տեղի ունեցածի հետևանքով իրավիճակի փոփոխությունը կարո՞ղ է Հայաստանի վրա որևէ ազդեցություն ունենալ, Դեմիրճյանը նշեց, որ Ուկրաինայի և Հայաստանի իրավիճակը շատ տարբեր է, պետք չէ համեմատել, և եթե որևէ տեսակ զարգացումներ պիտի լինեն Հայաստանում, դա ՀՀ քաղաքացիների պատասխանատվությունն է ՀՀ տարածքում: Ամեն դեպքում, իրենք դրսից չենք խառնվում այս հարցերին, ինչպես քանիցս են ասել:
«Հայաստանի ներքաղաքական կյանքի մասին դուք, վստահաբար, առավել տեղյակ եք, խոսվում է ոչ իշխանական ուժերի համախմբման մասին, սրանից ավել ասելիք չունենք, մանավանդ՝ Բրյուսելի մեջ, քանիցս ասել ենք, որ ներհայաստանյան հարցերին որևէ ձևով չենք անդրադառնալու»,- ասաց նա:
Ոչ իշխանական ուժերի համախմբումից ինքը՝ Դեմիրճյանը, դրական ակնկալիքներ ունի, նշում է, որ ցանկացած աշխատանք, որ ժողովրդավարական ձևերով է լինում, հատկապես այդ ուժերի համախմբումը, բոլորի կողմից գնահատելի է: «Եթե համեմատենք շրջանի հայ երկրների հետ ու հատկապես Ադրբեջանի, որտեղ որևէ կերպ հակաիշխանական ուժեր չկան, դրան հակառակ՝ այդ համախմբումը գնահատելի է, և ճիշտ ճանապարհին ենք»,- ասաց նա:
