ՆԱՏՕ-ն վերագնահատում է Ռուսաստանի հետ հարաբերությունները՝ կապված Ուկրաինայում ստեղծված իրավիճակի հետ: Այս մասին CNN հեռուստաալիքին տված հարցազրույցում հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը:
«Մենք այժմ վերագնահատում ենք Ռուսաստանի հետ մեր հարաբերությունները: Մենք արդեն որոշել ենք դադարեցնել ՌԴ-ի հետ գործնական համագործակցությունը: Իսկ երբ դաշինքի անդամ երկրների ԱԳ նախարարները հանդիպեն ապրիլի 1-ին և 2-ին, կվերանայվեն Ռուսաստանի հետ մեր բոլոր կապերը:
Մենք ծրագրում էինք համատեղ օպերացիա անցկացնել ծովում՝ ապահովելով ամերիկյան նավի անվտանգությունը, որում կոչնչացվի սիրիական քիմիական զենքը: Մենք կպահպանենք այն, բայց Ռուսաստանն այլևս այդ օպերացիային չի մասնակցի: Դա համագործակցությունը դադարեցնելու օրինակներից մեկն է»,- ասել է Ռասմուսենը:
