ՀՀ գիտությունների ազգային ակադեմիայի շենքի առջև այսօր հավաքվել էին Պարտադիր կուտակային համակարգի և իրենց աշխատավարձից պահումների դեմ պայքարող մի քանի տասնյակ երիտասարդ գիտնականներ: Նրանք ԳԱԱ տնօրինությանը դիմում-նամակ հանձնեցին:
Երիտասարդ գիտնականները նշում էին, որ իրենց աշխատավարձից կուտակային պահումներ արվել են, սակայն ոչ թե հենց հունվարից, այլ երկրորդ ամսվա աշխատավարձից: «Օրենքի ստեղծման օրվանից դժգոհ եմ օրենքի ամբողջ էությունից, ոչ միայն առանձին դրույթներից, կարծում եմ` սխալ ժամանակ է ընտրված: Այսօր երիտասարդ գիտնականները, հայրենասիրությունից դրդված կամ այլ տեղում աշխատելու հնարավորություն չունենալով, մնում են Հայաստանում: Իմ կարծիքով` նրանք կենցաղային-առօրյա հարցերը կարևորելով` պետք է կարողանան այս հարցի շուրջ համախմբվել»,- ասաց ֆիզիկայի ինստիտուտի աշխատակիցներից մեկը:
Նամակի հետ ԳԱԱ տնօրինությանը հանձնվեցին նաև հարյուրից ավել ստորագրություններ, որոնցով գիտնականները փաստում էին` անկախ տարիքից, բոլորը դեմ են այս համակարգին: «Նամակում մեր` երիտասարդ գիտնականներիս մտահոգություններն են, նաև` որպես ՀՀ քաղաքացիների, թե ինչ ազդեցություն կունենա այն գիտության վրա ընդհանրապես»,- ասաց նա:
Երիտասարդները նշեցին, որ նույնաբովանդակ նամակներ են պատրաստվում հանձնել ՍԴ և կառավարություն:
ԳԱԱ շենքից հավաքվածներին ընդառաջ եկավ գործերի կառավարչության աշխատակիցներից մեկը, որը ներկայացավ որպես Մնոյան Սվետլանա: «Եկել եմ նամակի հետևից: Ռադիկ Մարտիրոսյանը հիմա շենքում չէ»,- ասաց նա: Հետաքրքրվեցին` արդյոք Ռադիկ Մարտիրոսյանը տեղյա՞կ է, որ հավաքված են գիտնականները ու դժգոհում են, նա պատասխանեց. «Եթե ինքը շենքում չի, ո՞նց կարող է տեղյակ լինել»:
Հակառակ նրա պնդումների` ԳԱԱ նախագահ Ռադիկ Մարտիրոսյանին լրագրողները գտան իր տեղում: Նա լրագրողներին նախապես ընդունեց բարկացած. «Մի հատ մի վռազեք, էս ի՞նչ ա, բանակով եկել եք, ներխուժել, ձեզ ո՞վ է թույլ տվել, որ եկել եք, ստեղ կանգնել եք»: Քիչ անց, սակայն, նա լրագրողներին ներս հրավիրեց ու հարցերին պատասխանեց:
«Ուրեմն` պահումների մասին. պահել թե ոչ, այդ օրենքն ընդունվելու է թե չի ընդունվելու, դա ինձնից կախված չէ, ինչպես ամբողջ հանրապետությունում: Ես այստեղից նայում էի, ինձ ծանոթ որևէ գիտնական չտեսա: Ես ասում եմ` մոտ 25-30 տոկոսը ակադեմիայի համակարգում երիտասարդ գիտաշխատողներ են, ես մեկին չտեսա իմ ճանաչածներից, բայց հակառակն էլ չեմ կարող պնդել»,- ասաց նա: Հարցին` ինչո՞ւ հրաժարվեց հանդիպել գիտնականներին, ինչու ասացին` տեղում չէ` նա զարմանքով պատասխանեց. «Ո՞վ ասաց…», ապա նշեց, որ կարգ գոյություն ունի:
«Ես ունեմ հազար ու մի հանձնարարական, որ պիտի կատարեմ, դուք բոլորդ եկել եք, ինձ հետ ոչ ոք չի պայմանավորվել, ես դրա համար ասեցի` կա քաղաքակիրթ կարգ, նամակ ունեն, թող հանձնեն, գնան»,- ասաց նա:
Երիտասարդները նամակը հանձնեցին նաև ՍԴ, որտեղից խոստացան մեկ-երկու օրվա ընթացքում արձագանքել: Գիտնականները, պատասխանելով Մարտիրոսյանի տեսակետին, թե` իրենցից շատերն անգամ ակադեմիայի գիտնական չեն, նշեցին. «Մեր դեմքերը որ տեսնի, գուցե փոխի կարծիքը: Երևի հեռվից ա եղել, չի ճանաչել, համոզված եմ, որ տեսներ, կճանաչեր»:
