Աշխատանքային հերթական խորհրդակցության ժամանակ Երևանի քաղաքապետ Տարոն Մարգարյանին զեկուցվել է, որ «Ձեզ համար, կանայք» խորագրով առողջապահական ակցիայի շրջանակում նախորդ շաբաթվա ընթացքում քաղաքապետարանի ենթակայության համաբուժարաններ է դիմել 3786 կին: Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ կատարված տարբեր հետազոտություններից հետո 371 կին ուղեգրվել է վիրահատության, որոնցից 71-ն արդեն վիրահատվել են:
Շինարարության և բարեկարգման վարչության պետը զեկուցել է, որ ընթացքի մեջ է 2012-2013թթ. ընթացքում քաղաքապետարանի ծրագրով և «Երևան գազ», «Երևան Ջուր» և «Հայաստանի էլեկտրական ցանցեր» ընկերությունների, ինչպես նաև մասնավոր կազմակերպությունների կողմից իրականացված ասֆալտապատման աշխատանքներում առկա թերությունները սեփական միջոցներով վերացնելու գործընթացը: Մեկ կազմակերպություն արդեն իսկ վերացրել է ի հայտ եկած թերություններն ու ավարտել աշխատանքը: Քաղաքապետը հանձնարարել է շարունակել աշխատանքների իրականացման ուղղությամբ խիստ հսկողությունն ու աշխատանքների ընթացքի մասին պարբերաբար իրազեկել հանրությանը:
Անդրադառնալով մայրաքաղաքում իրականացվող սանմաքրման և աղբահանության աշխատանքներին՝ քաղաքապետը պատասխանատու բոլոր օղակներին հանձնարարել է առավել խիստ և հետևողական լինել սանմաքրման ձեռնարկությունների կողմից աշխատանքների պատշաճ իրականցման նկատմամբ:
«Խստորեն հետևեք, որ աղբահանության աշխատանքները կազմակերպվեն ու իրականացվեն այնպես, ինչպես սահմանված կարգն է: Մասնավորապես, աղբ տեղափոխող մեքենաների դեպքում հստակ սահմանված է, որ դրանց թափքերը պետք է ծածկված լինեն, մինչդեռ այսօր հանդիպում ենք նաև դեպքերի, երբ տվյալ նորմը չպահպանելու պատճառով աղբավայր տեղափոխվող աղբի մի զգալի մասը հայտնվում է փողոցների երթևեկելի հատվածներում: Մեր համաքաղաքացիներից նաև դժգոհություններ ենք ստանում, որ աղբի տեղափոխման գործընթացը փնթի է կազմակերպվում, ինչի հետևանքով աղբատարների հարակից տարածքները միառժամանակ վերածվում են մինի աղբավայրերի: Նման անփութությունն անթույլատրելի է, ուստի ձեռնարկեք համապատասխան միջոցներ ու խստորեն հետևեք սահմանված նորմերի պահպանմանը»,- ընդգծել է Տարոն Մարգարյանը:
Մայրաքաղաքի կանաչապատման աշխատանքների մասով բնապահպանության վարչության պետը զեկուցել է, որ դրանք վարչական բոլոր շրջաններում ընթանում են սահմանված ժամանակացույցի համաձայն: Զեկուցվել է նաև, որ կայացել է ոռոգման ցանցերի ընդլայնման համար հայտարարված մրցույթը: Արդյունքների ամփոփումից հետո կմեկնարկեն բուն աշխատանքները:
Քաղաքապետ Տարոն Մարգարյանը հանձնարարել է նախապատրաստական աշխատանքներ տանել նաև ապրիլի 1-ից մայրաքաղաքում առկա բոլոր ցայտաղբյուրների և ապրիլի 7-ից՝ շատրվանների շահագործման ուղղությամբ:
«Անվտանգ քաղաք» ծրագրի աշխատանքների շրջանակում էլ հանձնարարվել է կարգաբերել արտաքին լուսավորության ցանցն ու տեսախցիկներով կահավորել Մանկական երկաթուղու, ինչպես նաև դեպի երկաթուղի տանող թունելի տարածքը:
Հանձնարարվել է նաև հայտնաբերել ու գույքագրել վարչական շրջաններում գտնվող և ոչ նպատակային նշանակությամբ տնօրինվող գույքերն և օրենքով սահմանված կարգով ձեռնարկել անհրաժեշտ քայլեր:
Երևանի գլխավոր ճարտարապետն էլ զեկուցել է, որ գույքագրվել է նախկինում կառուցված 417 մասնավոր օբյեկտ, որոնց սեփականատերերը պարտավորություն են ստանձնել սեփական միջոցներով իրենց կառույցների մուտքերը հարմարեցնել հենաշարժողական խնդիրներ ունեցող անձանց ազատ տեղաշարժի համար: Զեկուցողը նաև հավելել է, որ տվյալ օբյեկտներից 11-ն արդեն իսկ կառուցել են սահմանված չափորոշիչներով թեքահարթակները: Քաղաքապետը հանձնարարել է աշխատանքները կազմակերպել հնարավորին սեղմ ժամկետում և դրանց իրականացման նկատմամբ տեղերում սահմանել խիստ հսկողություն:
Խորհրդակցության շրջանակում զեկուցվել է, որ Երևանի քաղաքապետարանի ենթակայության Վրեժ Համբարձումյանի անվան թիվ 17 դպրոցի տնօրենը սեփական դիմումի համաձայն ազատվել է աշխատանքից: Նշվել է, որ մանկավարժին ոչ հարիր պահվածքի համար նույն տնօրենը շուրջ 6 ամիս առաջ ստացել էր բանավոր խիստ նկատողություն և նախազգուշացվել, որ կրկնվելու դեպքում կազատվի աշխատանքից: Անդրադառնալով տնօրենի ազատման հարցին՝ Տարոն Մարգարյանն ընդգծել է. «Զբաղեցրած պաշտոնից կազատվեն բոլոր այն դպրոցների տնօրենները, որոնք թույլ կտան իրենց մանկավարժին ոչ հարիր պահվածք: Դպրոցում կարգուկանոնի և համապատասխան առողջ մթնոլորտի ապահովումը մեզ համար կարևոր է, և այդ հարցում մեր մոտեցումը հստակ է: Եթե ծնողների կողմից կան արդարացի դժգոհություններ, ընդ որում՝ երբ դրանք մի քանի անգամ են բարձրացվում, ապա պետք է անհապաղ ձեռնարկել համապատասխան քայլեր: Աշակերտների և ծնողների նկատմամբ կոպիտ և անհարգալից վերաբերմունքն անպատիժ չի կարող մնալ: Եվ սա վերաբերում է ոչ միայն հանրակրթական, այլև կրթամշակութային բոլոր հաստատությունների տնօրեններին»,- ընդգծել է քաղաքապետ Տարոն Մարգարյանը:
Նշվել է, որ խիստ նկատողություն է հայտարարվել նաև թիվ 37 դպրոցի տնօրենին՝ նախազգուշացմամբ, որ կրկնվելու դեպքում վերջինս կազատվի աշխատանքից:
Քաղաքապետ Տարոն Մարգարյանը հանձնարարել է խիստ հսկողություն սահմանել նաև դպրոցներում դրամահավաքության հնարավոր դեպքերը բացառելու ուղղությամբ: Նա ընդգծել է, որ դրամահավաքության որևէ դեպքի հայտնաբերման պարագայում կձեռնարկվեն համապատասխան միջոցներ, ընդհուպ՝ տնօրեններին աշխատանքից ազատում:
