Լեռնային Ղարաբաղը Ղրիմում կայացած հանրաքվեն դիտարկում է որպես ազգերի ինքնորոշման իրավունքի իրացում: Այսօր «Առաջին լրատվական»-ի հետ զրույցում այս մասին ասաց ԼՂ նախագահ Բակո Սահակյանի մամլո խոսնակ Դավիթ Բաբայանը՝ անդրադառնալով երեկ Ղրիմում տեղի ունեցած հանրաքվեին։
Նա նշեց, որ իրենք Ղրիմի իրադարձությունները դիտարկում են որպես ազգերի ինքնորոշման իրավունքի իրացում՝ անկախ դրա արդյունքներից: Ըստ Դավիթ Բաբայանի՝ եթե նույնիսկ Ղրիմը քվեարկեր Ուկրաինայի կազմում մնալու օգտին, կիրացներ իր կամարտահայտության իրավունքը, որի իրականացումը ազգերի ինքնորոշման իրավունքի իրականացում է:
«Ղրիմի ժողովրդի կամքն է, կամարտահայտությունն է: Կային այնտեղ միջազգային դիտորդներ, նրանք իրենց զեկույցներում գրել են, որ ամեն ինչ անցել է նորմալ, լուրջ խախտումներ չեն եղել:
Բնական է, որ այդ կամարտահայտությունը մենք ընդունում ենք որպես ազգերի ինքնորոշման իրավունքի իրականացում, լուրջ խախտումներ դիտորդները չեն գրանցել: Երեկ ժողովրդի կամարտահայտությունն է տեղի ունեցել: Մենք նույնով անցել ենք, եթե ամեն ինչ նորմալ անցել է ինչպե՞ս կարող ենք ասել՝ մեկին կարելի է, մյուսին՝ ոչ»,- ասաց Դավիթ Բաբայանը:
Հիշեցնենք, որ Ղրիմը հայտարարվել է անկախ ինքնիշխան պետություն՝ Ղրիմի Հանրապետություն, որից հետո Ղրիմի Հանրապետությունը, ի դեմս Գերագույն խորհրդի, դիմել է Ռուսաստանին՝ հանրապետության կարգավիճակով Դաշնության կազմում որպես սուբյեկտ ներառվելու առաջարկով։
Ղրիմի կարգավիճակի վերաբերյալ հանրաքվեի կազմակերպման հանձնաժողովի համաձայն՝ ընտրողների 96.77%-ը կողմ է քվեարկել ՌԴ-ի կազմում ընդգրկվելուն։ Ղրիմում հանրաքվե էր անցկացվել երկու հիմնական հարցով.
1. Կո՞ղմ եք Ռուսաստանին Ղրիմի միացմանը՝ ՌԴ-ի սուբյեկտի կարգավիճակով.
2. Կո՞ղմ եք Ղրիմի Հանրապետության 1992-ի սահմանադրության վերականգնմանը և Ղրիմի կարգավիճակին՝ որպես Ուկրաինայի մաս:
