Պահպանողական Սաուդյան Արաբիայում ավելի քան 400 գրքեր հայտարարվել են արգելված: Դրանց թվում են հայտնի պաղեստինցի գրող Մահմուդ Դարվիշի ստեղծագործությունները: Այս մասին հայտնում է ITAR-TASS-ը:
Թերթի տեղեկություններով՝ համապատասխան որոշումն ընդունվել է Թագավորության կրոնական ոստիկանության կողմից Սաուդյան Արաբիայի անվտանգությանը սպառնացող հրապարակումների դեմ պայքարի արշավի շրջանակում:
420 գրքերից ավելի քան 10 հազար գրքեր առգրավվել են գրքի միջազգային տոնավաճառի ժամանակ, որը սկսվել էր Էր-Ռիադում մարտի 4-ին:
Ինչպես նշում են վերլուծաբանները, Թագավորությունում միաժամանակ արգելքի տակ հայտնված գրքերի թիվն աննախադեպ է: «Ալ-Մուտավայի» (ազդեցիկ կառույց, որը կոչված է ակնդետ հետևելու երկրում բարոյական նորմերի կատարմանը) կողմից այդքան վճռական միջոցառումները ձեռնարկվել են Կատարի և Պարսից ծոցի երեք այլ միապետությունների՝ Սաուդյան Արաբիայի, ԱՄԷ-ի և Բահրեյնի միջև հարաբերությունների սրման ֆոնին: Վերջին երեքն իրենց դեսպաններին հետ են կանչել Դոհայից այս ամսվա սկզբին՝ մեղադրելով երկրի ներքին գործերին միջամտելու մեջ:
Սաուդյան Արաբիայի իշխանությունների այս քայլը դրական է ազդել գրողների ստեղծագործությունների ժողովրդականացման վրա: Ընթերցողները սկսել են մեծ հետաքրքրություն դրսևորել դրանց հանդեպ ու ներբեռնել գրքերի էլեկտրոնային տարբերակները:
