Ռոբերտ Քոչարյանի և առհասարակ Մարտի 1-ի գործով դատաքննությունն, ակնհայտ է, որ ոչ միայն Հայաստանի ներքաղաքական տիրույթի հետաքրքրությունների հարց է։ Սրա մասին է վկայում, օրինակ, Հայաստանում Ռուսաստանի դեսպանի վերջին շրջանի ակտիվությունը։ Նախ՝ հանդիպում է Ռոբերտ Քոչարյանի հետ, ապա ՍԴ նախագահ Հրայր Թովմասյանի, և այս ամենը ռուսական կողմի նախաձեռնությամբ։
«Հայրենիք և պատիվ» կուսակցության նախագահ Գառնիկ Մարգարյանը Ռուսաստանի հետաքրքրություններն այս գործում բացատրում է հետևյալ կերպ. «Պատճառները բազմաթիվ են։ Երբ Լևոն Տեր-Պետրոսյանից հետո, կեղծիքների հիման վրա, առանց որևէ իրավունք ունենալու, այդ մարդն իրեն նախագահ հռչակեց, սկսեց կատարել Ռուսաստանի բոլոր հրահանգներն ու պահանջները։ Դա իրենից ենթադրում է խոշոր ռազմավարական օբյեկտների հանձնում, այդ թվում նաև «Գազպրոմը», որի կեսը ՀՀ կառավարությանն էր, հորինեցին 145 միլիոն պարտք, այն դեպքում, երբ այլ պետությունների տասնյակ միլիարդավոր պարտքը Ռուսաստանը մարեց։ Փաստորեն, Հայաստանը, լինելով ԱՊՀ, ՀԱՊԿ, ապա ԵԱՏՄ անդամ, չներվեց այդ պարտքը, ու սկսվեց այդ հանձնումը։ Չի եղել մի դեպք, երբ նրանք չհամաձայնեն Ռուսաստանի բարձր ներկայացուցիչների պահանջներին, հլու-հնազանդ կատարվել են բոլոր պահանջները»։
Մարգարյանն ընդգծեց. «Սկսենք այնտեղից, թե ինչո՞ւ էին այդպես վարվում։ Գերտերությունները՝ հատկապես Միացյալ Նահանգները, ամեն ինչ անում էին, որ մտնեն Հարավային Կովկաս՝ առաջին հերթին, իսկ Հայաստանում կար լուրջ խնդիր՝ արցախյան հարցի լուծում, դրանով իսկ ՆԱՏՕ-ն մոտեցնել Ռուսաստանի սահմանին հարավկովկասյան տարածքում։ Պայքար է գնում, Միացյալ Նահանգների ու Ռուսաստանի միջև ու այդ պայքարի պատճառը՝ տարածքներում ազդեցության ոլորտի մեծացումը՝ նավթ, գազ, ածուխ… նրանք դեռ վաղուց լուրջ պայքար են ծավալել, ու Ռուսաստանի դեմ պատժամիջոցները հենց այդ նպատակն են հետապնդում։ Երևի թե ռուսները հեռատես գտնվեցին՝ ելնելով իրենց ռազմավարական շահերից և ոչ նրանից, որ Հայաստանը շատ են սիրում, ավելի շուտ մտան ու ամենը վերցրեցին իրենց վերահսկողության տակ։ Դեռ 2013-2015 թվականներին, երբ «Հակակոռուպցիոն» ծրագիրն էր իրականացնում՝ այդ ամենի մասին խոսել ենք ու ապացույցներով ներկայացրել։ Ծայրաստիճան կոռուպցիան Հայաստանում ստեղծվել է Ռուսաստանի վերահսկողության ու հովանավորության ներքո։ Այդ թվականներին Հայաստանը կոռումպացվածների շարքում 129-րդ էր, և Ռուսաստանն էլ ոչնչով չէր զիջում»։
Մարգարյանը նշեց՝ այստեղ կային կատարողներ, այնտեղ՝ պահանջողներ. «Դա նորություն չէ, չեմ ուզում անցնել պատմությանը, կան պատմաբաններ, որոնք այդ մասին գրել են՝ իրենք միշտ այդպես են վերաբերվել։ Մենք ունենք լրջագույն պատմաբաններ, ովքեր ապացուցել են, թե ինչու ընկավ Ղարսը։ Մենք պատմության այս էջերը չպետք է մոռանանք։ Համարում եմ լրջագույն ու կարևորագույն փաստ ապրիլյան հրահրված պատերազմը, ինչո՞ւ Ռուսաստանը նախապես չմիջամտեց ու չկանգնեցրեց, պայմանավորվածությո՞ւն կար։ Ահա, այսպիսի բազմաթիվ հարցեր, երբ ընկերացել են, գտել խոնարհ ծառայողներ ու կատարողներ, հիմա էլ չեն ընդունում նոր կառավարությանը։ Նիկոլ Փաշինյանը վարչապետն է, որոշողը ժողովուրդը, ու այս պարագայում իրենց պատվերները նույն մասշտաբներով չի կարող իրականացվել։ Ամեն ինչ արել են ու անելու են, կանգ չեն առնելու այնքան ժամանակ, մինչև իրենց կամակատարները ազատության մեջ չգտնվեն»։
Գառնիկ Մարգարյանը, դիմելով ուժային կառույցներին, նշեց. «ԱԱԾ-ն պետք է վերադառնա Մարտի 1-ի մյուս դերակատարների պատասխանատվության հարցին, այս հարցում էլ է Կրեմլը մտահոգ։ Երրորդ նախագահն էլ պետք է հայտնվի պատասխանատուների ցանկում, և նրա հետ միասին էլի շատ ու շատ մարդիկ»։
