Վերջերս Աջափնյակ վարչական շրջանի, հատկապես Հալաբյան փողոցի բնակիչները մեզ դժգոհություններ էին ներկայացնում, որ իրենք քնից արթնանում են ոչ թե ինքնակամ կամ գյուղերի նման՝ աքլորականչից, այլ առավոտյան մաքրման աշխատանքներից առաջացած աղմուկից:
Նախ՝ ջրցան մեքենայի ազդանշաններից և ձայնից, այնուհետև հավաքարարների կողմից աղբատար թասիկների քաշոցից առաջացած ձայներից: Սա ոչ միայն բնակիչներին արթնացնում է քնից, այլև ազդում է նրանց նյարդային համակարգի վրա:
Բնակիչները դիմել են նաև վարչական շրջանի ղեկավարությանը, սակայն հուսադրող պատասխան չեն ստացել, հետևաբար մեզ խնդրեցին, որ մենք քաղաքապետարանի ուշադրությունը հրավիրենք վերը նշված խնդրի վրա:
Քաղաքապետարանի լրատվական վարչության պետ Արթուր Գևորգյանը, մեր միջոցով ծանոթանալով խնդրին, անձամբ խոսեց Աջափնյակ վարչական շրջանի ղեկավար Ռուբեն Հովսեփյանի հետ։ Վերջինս ասաց, թե խնդիրն իրեն ծանոթ է: Ներկա պահին փորձում են լուծում գտնել և աղբը տեղափոխող անիվներով սայլակներ ստանալ, որ նման աղմուկ չբարձրանա: Ինչ վերաբերում է ջրցան մեքենաներին, ապա նույնիսկ ցանկության դեպքում այդ մեքենաների վրա խլացուցիչ համակարգ հնարավոր չէ տեղադրել:
