Ինչպես այսօր գրում է the New York Times-ը, կրեդիտ քարտերի տարածման հետ մեկտեղ կրճատվում է նաև թղթադրամների քանակը: Օրինակ՝ անցած տարի ԱՄՆ ֆինանսների նախարարությունը պատմության մեջ առաջին անգամ հրաժարվեց 10 դոլարանոց թղթադրամների տպագրությունից, իսկ 5 դոլարանոց թղթադրամների ծավալը նվազեց մինչև 30-ամյա մինիմումին:
Ինչպես նշում է թերթը, ամերիկացիներն ավելի նախընտրում են քարտով իրականացնել իրենց վճարումները: Անցած տարի Նյու Յորքում տաքսու վճարումների 36%-ն իրականացվել է անկանխիկ: Ավելի փոքր թղթադրամները ժողովրդի մոտ պահվում են թեյավճարների համար:
Այդուհանդերձ, որոշ փորձագետներ կարծում են, որ թղթադրամները դեռ շատ երկար` մոտ 200 տարի կմնան շրջանառության մեջ: Կանխիկ վճարումները հատկապես տարածված են փոքր բիզնեսում: Նշվում է, որ ԱՄՆ-ում և աշխարհում ամենատարածված թղթադրամը 100 դոլարանոցն է: 2010 թ. ֆինանսների նախարարությունն առաջին անգամ ավելի շատ 100, քան մեկ դոլարանոց է տպագրել: