Այսօր՝ հունիսի 18-ին, Ազգային ժողովում հրավիրել է 7-րդ գումարման 2-րդ նստաշրջանը: Այժմ քննարկվում է Սահմանադրական դատարանի դատավորի ընտրության հարցը: ՀՀ նախագահը ՍԴ դատավորի թափուր տեղի համար առաջադրել է Վահե Գրիգորյանի թեկնածությունը: Թեկնածուին ներկայացրեց ՀՀ նախագահի աշխատակազմի ղեկավար Էմիլ Տարասյանը:
Թեկնածու Վահե Գրիգորյանը ներկայացրեց իր տեսլականը ՍԴ-ի վերաբերյալ. «Միակ տանդեմը օրենսդիր և գործադիր իշխանություններին մնալու է արդարադատության համակարգը: Վստահաբար այս համակարգը ի վիճակի չի լինելու դիմադրել օրենսդիր և գործադիր իշխանությունների ծանրությանը՝ առանց ՍԴ-ի գործուն աջակցության: ՍԴ-ն ամենամեծ հարվածը կրել է ընտրական վեճերի վերաբերյալ իր կայացրած որոշումների հետևանքով»:
Նրա խոսքով՝ ՍԴ-ն իրենից հեռացրել է փաստերը քննելու իր լիազորություններից. «ՍԴ-ն համակարգային քննության չի դարձրել ընտրությունների կոնկրետ խախտումները»:
Նա ներկայացրեց նաև իր համոզմունքը դատարանակազմության վերաբերյալ՝ կարևորելով կանանց քվոտան. «ՍԴ-ում պետք է ներկայացված լինեն Արցախի և Սփյուռքի մեր հայրենակիցները»:
Վահե Գրիգորյանը նշեց, որ ՀՀ նախագահը պետք է ներկայացնի իր պաշտոնավարման ընթացքում ակնկալվող թափուր դատավորների պաշտոններում իր առաջադրումների ցանկը. «Դա կամրապնդի իր դիրքերը և հետագայում ԱԺ-ին ներկայացնելիս իր թեկնածուի ընդունման հարցը: Պետք է մշակել մրցութային ընթացակարգի ուղեցույց: ՍԴ դատավորների թեկնածուների ներկայացման, նրանց ընտրության և չընտրության գործընթացը չպետք է կրկնվի: Սա անփորձության հետևանք է եղել: Միշտ մտածվել է, որ ամեն ինչ կանխորոշված է լինելու, թեկնածուները ներկայացվելու են, և ոչ ոք չի մերժվելու»:
Մանրամասները՝ տեսանյութում: