Հունիսի 16-ին տեղի ունեցավ «Քաղաքացիական պայմանագիր» կուսակցության համաժողովը, որի ժամանակ հնչած ելույթները և ձևակերպումները քննարկելու համար «Առաջին լրատվական»-ը հյուրընկալել է հրապարակախոս Կարպիս Փաշոյանին, քաղաքագետ Արմեն Վարդանյանին, ԱԺ «Իմ քայլը» խմբակցության պատգամավոր, «Քաղաքացիական պայմանագիր» կուսակցության վարչության անդամ Արմեն Փամբուխչյանին:
Կարպիս Փաշոյանը, անդրադառնալով Նիկոլ Փաշինյանի ելույթին, ըստ որի՝ իրենք հրաժարվում են «իզմ»-երից, ասաց. «Տպավորությունն այնպիսին է, որ իրենք լավ չեն հասկանում, թե ինչ է իրենից ենթադրում «իզմ»-ը»:
Նրա խոսքով՝ իրենք չեն պահանջում, որ կառավարող ուժը դառնա այս կամ այն գաղափարախոսության մոլի պաշտպան, և դա իրենց համար դառնա ինքնանպատակ. «Չենք պահանջում, որ մարքսիզմն իրենց համար կրոն դարձնեն, Մարքսին աղոթեն: «Իզմ»-ը ընդամենը միջոց է, ճանապարհային քարտեզ, աշխարհայացք. մենք ուզում ենք հասկանալ, թե ովքեր են այնտեղ նստած, ինչ գույն ունեն, ինչպես են տեսնում աշխարհը: Իսկ այժմ կառավարող ուժի տարբեր ներկայացուցիչներ նույն իրավիճակի մասին կարող են բոլորովին տարբեր՝ գաղափարապես հակոտնյա կարծիքներ արտահայտել: Նրանք առավոտյան կարող են լինել սոցիալիստ, երեկոյան՝ ազգայնական, ցերեկը՝ լիբերալ»:
Կարպիս Փաշոյանը կարծում է, որ «իզմ»-երից հեռանալը նշանակում է տեղափոխվել պատեհապաշտության դաշտ. «Սա անընդունելի է. «իզմ»-ի բացակայությունը ներկայացնում է մեկ այլ «իզմ»-ի՝ պոպուլիզմի, դեմագոգիայի»:
Արմեն Փամբուխչյանը, սակայն, համաձայն չէ այս կարծիքի հետ: Նրա խոսքով՝ առանց «իզմ»-երի քաղաքականությունը ի վերջո հանգեցրեց հեղափոխության. «Կուսակցությունը համախմբել և առաջնորդել է հեղափոխությունը, հեղափոխությունը կատարել է անհատը. կատարել են այն անհատները, որոնք կրել են տարբեր «իզմ»-եր, բայց իրենց համախմբել է մեկ ընդհանուր գաղափարը»:
Քաղաքագետ Արմեն Վարդանյանի համար, սակայն, ցանկալի է, որ ցանկացած կուսակցություն ունենա գաղափարախոսական հենք. «Ես, օրինակ, լիբերալ-դեմոկրատական հայացքներ ունեցող անհատ եմ և ընտրություն կատարելիս ձայն եմ տվել այդպիսի գաղափարախոսական հենք ունեցող կուսակցություններին: Բայց հանուն արդարության պետք է ասեմ, որ վերջին ժամանակներս ժամանակակից քաղաքագիտության մեջ այդպիսի տերմին է ներմուծվել՝ «բռնիր բոլորին»: Ժամանակակից քաղաքագիտության տիպաբանության մեջ կան այդպիսի կուսակցություններ, որոնք չունեն հստակ գաղափարախոսական հենք և ցանկանում են որքան հնարավոր է շատ էլեկտորատ ներքաշել իրենց կողմը: Այնպես որ՝ սա էլ նորմալ է: Այս առումով վարչապետի ասածը հասկանալի է, բայց հասկանալի չէ, թե ինչ է նշանակում քաղաքացիական կուսակցություն. ցանկացած կուսակցություն էլ քաղաքացիական է»:
Հարցազրույցն ամբողջությամբ՝ տեսանյութում: