Հունիսի 5-ին ՀՀ վարչապետ Նիկոլ Փաշինյանը անդրադարձավ երկրում հակակոռուպցիոն դատարանի ստեղծման անհրաժեշտությանը: Նա նշեց, որ միջազգային գործընկերների հետ քննարկվել է այն 3 տարում ստեղծելու հեռանկարը: Թեմայի շուրջ զրուցելու համար «Առաջին լրատվական»-ը հյուրընկալել է Հայաստանի ՔՀԿ-ների հակակոռուպցիոն կոալիցիայի ծրագրի ղեկավար Մարիամ Զադոյանին, ՄԱՀԻԻ փորձագետ-փաստաբան Արտաշես Խալաթյանին և փաստաբան Գևորգ Գյոզալյանին:
Դիտարկմանը՝ մեր Սահմանադրությունը մասնագիտական դատարանների ստեղծման հնարավորություն արդյոք ընձեռո՞ւմ է, Արտաշես Խալաթյանը դրական պատասխանեց. «Օրենքով թույլատրվում է ստեղծել մասնագիտացած դատարաններ, սակայն Սահմանադրությունը մի շատ կարևոր վերապահում է անում, այն է՝ արտակարգ դատարանների ստեղծումը արգելվում է»:
Մարիամ Զադոյանն էլ օրվա հրամայական է համարում հակակոռուպցիոն դատարանի ստեղծումը. «Նախ՝ այս պահին գործընթացներ են գնում վեթինգի և մեր դատական համակարգը առողջացնելու հետ կապված, որպեսզի այն զերծ լինի կոռուպցիոն ռիսկերից»:
Փաստաբան Գևորգ Գյոզալյանը մի կարևոր շեշտադրում արեց՝ ասելով. «Այս ամբողջ պրոցեսը սկսվեց այն պատճառով, որ ներկայիս Բարձրագույն դատական համակարգը, կատարողական հանձնաժողովն ու արդարադատության նախարարությունը իրենց տեղում չեն եղել: Եթե ժամանակին արդարադատության նախարարները շատ շտապ արձագանքեին քաղաքացիների բազմաթիվ դիմումներին ու կարգապահական վարույթներ հարուցեին դատավորների նկատմամբ, և ԲԴԽ-ն էլ անաչառության պայմաններում քններ, ապա, ես կարծում եմ, մենք չէինք հասնի սրան՝ չէինք խոսի վեթինգի կամ հակակոռուպցիոն դատարանների մասին»:
Փաստաբանը նշեց, որ ինքը վեթինգի կամ հակակոռուպցիոն դատարանների մասին կարող է խոսել այն ժամանակ, երբ դա ստանա միս ու արյուն. «Իրականում մենք ունեցել ենք այդ գործիքները, ուղղակի դրանք չենք օգտագործել»:
Հարցազրույցն ամբողջությամբ՝ տեսանյութում:
