«Հրապարակ»-ը գրում է. «Շուրջ մեկ շաբաթ սպասելուց հետո վերջապես ստացանք Պետեկամուտների կոմիտեին ուղղած մեր հարցման պատասխանը: Իսկ հարցումը վերաբերում էր, այսպես կոչված, «խվատայկաներին», որոնց վերաբերյալ ամիսներ առաջ աղմուկ բարձրացավ: Խոսքն այն ավտոմատների մասին է, որոնցից մետաղադրամների օգնությամբ մարդիկ ծխախոտ կամ փափուկ խաղալիք էին որսում: Դրանք, որպես կանոն, տեղադրված էին խանութների սրահներում կամ սպասասրահներում: Մեծ եկամուտներ չէին բերում տերերին, բայց, ինչպես նման խանութներից մեկի սեփականատերն է ասում, «կոպեկ էին, մի ցավի ոտ էին կոտրում»:
Չգիտես ինչու, իշխանության մեջ գտնվողները որոշեցին, որ այդ ավտոմատները պետք է հարկվեն, քանի որ դրանց վրա տարածվում է «Արտոնագրային վճարի մասին» ՀՀ օրենքի 7-րդ հավելվածի 10-րդ կետը, համաձայն որի՝ դրանք հանդիսանում են «արտոնագրային վճարով հարկվող գործունեություն», և տարեկան մոտ 5 միլիոն դրամի հարկ պետք է վճարվի յուրաքանչյուրից: «Խվատայկաների» տերերը մի քանի օր բողոքի ակցիա արեցին կառավարության մոտ: Տեսնելով, որ ոչինչ չի օգնում՝ ցրվեցին տներով:
Ավելի ուշ իմացանք, որ ավտոմատները հիմնականում հանվել են՝ որը նկուղում է փոշոտվում, որն էլ Ռուսաստանից եկած «բիզնեսմենները» գնել-տարել են: Սակայն որքան մեծ էր մեր զարմանքը, երբ Նորագավիթի գազալցակայանում հայտնաբերեցինք դրանցից երեքը: Ողջ-առողջ, ծխախոտով լեցուն:
Դիմեցինք ՊԵԿ՝ տեղեկանալու, արդյո՞ք դրանք օրինական են, և կա՞ն այդ չափի հարկ վճարողներ: ՊԵԿ-ի գրավոր պատասխանից, որը, ենթադրում ենք, գրվել է այնպես, որ հնարավորինս շփոթության մեջ գցի հարցը բարձրացնողին, առանձնացնում ենք մի քանի հատված. «Այժմ ՀՀ տարածքում արտոնագրային վճարով հարկվող՝ մետաղադրամով շահագործվող 276 ավտոմատների համար 112 տնտեսվարող սուբյեկտ ստացել է արտոնագիր, և սահմանված կարգով ու ժամկետներում վճարել են արտոնագրային վճարի գումարները»: Ենթադրում ենք, որ խոսքը մեր նշած ավտոմատներին չի վերաբերում:
Ներկայացնում ենք Նորագավիթի գազալցակայանին կից «խվատայկաները»: Որպեսզի ՊԵԿ-ի գործը հեշտացնենք (գուցե` բարդացնենք), նշենք նաև, որ գազալցակայանը և դրան կից «խվատայկաները» պատկանում են Շենգավիթի ոստիկանապետ Վահե Մամիկոնյանին, ով նաև Հովիկ Աբրահամյանի փեսան է:»,–գրում է թերթը։
Մանրամասները՝ թերթի այսօրվա համարում։
