Թուրքական Anadolu գործակալության փոխանցմամբ՝ ադրբեջանական մեծաթիվ բնակչություն ունեցող Իգդիրում գործունեություն ծավալած «Հայկական անհիմն պնդումների դեմ պայքարի միության» (ASİM-DER) նախագահ Գյոքսել Գյուլբեյը «հերքել» է լրատվամիջոցներում հայտնված այն տեղեկատվությունը, թե իրենք խիստ վիրավորված են ադրբեջանական կողմից, ինչի համար էլ գրասենյակի վրայից իջեցրել են Ադրբեջանի դրոշը։
Նշվում էր, որ ASİM-DER-ը վիրավորվել է նրանից, որ ադրբեջանական կողմից հրավեր չի ստացել՝ մասնակցելու Բաքվում կայացող համայն աշխարհի ադրբեջանցիների 3-րդ համագումարին։
Միևնույն ժամանակ Գյուլբեյը չի կարողացել հերքել այն, որ իրենք այդ հրավերը չեն ստացել։
Հիշեցնենք, որ ASİM-DER-ն ամեն գնով պայքարում է Հայոց ցեղասպանության միջազգային ճանաչման դեմ, ինչպես նաև ամենուրեք ահազանգում այն մասին, թե նախկինում Օսմանյան կայսրության քաղաքացիներ հանդիսացած հայերի հետնորդներն այժմ սկսել են ուղիներ փնտրել Թուրքիայի Հանրապետության քաղաքացիություն ձեռք բերելու համար։
