Ամերիկյան «Ջորջ Բուշ» ատոմային ավիակիրը երեք օր մնալուց հետո լքել է Թուրքիայի հարավային Անթալիա նավահանգիստը: Այս մասին հայտնել է ԱՄՆ ռազմածովային ուժերի մամլո ծառայությունը:
Թե նավն ուր է ուղևորվել՝ չի հաղորդվում: Ծառայության տվյալներով՝ ավիակիրը շարունակում է գտնվել Միջերկրական ծովի ջրատարածքում, որը մտնում է ԱՄՆ ռազմածովային ուժերի 6-րդ օպերատիվ նավատորմի պատասխանատվության գոտում:
Ավիակրի հետ թուրքական ռազմածովային Աքսազ բազայից ծով է դուրս եկել այցով այնտեղ գտնվող հրթիռային «Ֆիլիպին Սի» հածանավը: Այն մտնում է «Ջորջ Բուշ» ավիակրի հարվածային խմբի կազմում: Միջերկրականի արևելք է ուղևորվում նաև խմբի կազմի մեջ մտնող «Ռուզվելտ» հրթիռային ականակիր նավը: Այն այցով գտնվում էր Խորվաթիայում: Ինչ վերաբերում է ավիակրային խմբի մեջ մտնող «Տրակստան» ականակիր նավին, այն շարունակում է գտնվել Սև ծովի ռումինական ափի մոտ, որտեղ մասնակցում է զորավարժությունների՝ Բուլղարիայի և Ռումինիայի ռազմածովային նավատորմերի նավերի հետ:
Ավելի վաղ ԱՄՆ ՊՆ-ում հայտնել էին, որ ամերիկյան ավիակրի շարժման երթուղին գաղտնի է պահվում անվտանգության նկատառումներով:
ԱՄՆ-ն ավիակիրն ուղարկել էր Սև ծովի ուղղությամբ՝ Ղրիմում ռուսական բանակի ներխուժման պատճառով: Ավիակիրն ուղարկվել է Ղրիմում իրադարձությունների զարգացմանն արձագանքելու հնարավորություն ունենալու համար:
