ԱՄՆ Ազգային անվտանգության գործակալությունը ծրագրել էր ողջ աշխարհում վնասակար ծրագիր տարածել միլիոնավոր համակարգիչների վրա: Այս մասին են վկայում գաղտնի փաստաթղթերը, որոնք լրագրողներին է փոխանցել ԿՀՎ նախկին աշխատակից Էդվարդ Սնոուդենը:
The Intercept պարբերականի հաղորդմամբ՝ գործակալությունը մշակել էր վնասակար ծրագրերի տեղադրման հատուկ տեխնոլոգիա, որը թույլ է տալիս տվյալներ ստանալ հեռավոր համակարգիչներից ու հեռախոսներից: Մարտավարությունը մշակվել էր Կառավարական կապի բրիտանական կենտրոնի հետ համատեղ:
Գործակալության որոշ լրտեսական ծրագրեր քողարկված են եղել Facebook-ի կեղծ սերվերի ներքո: Դրանք ներթափանցել են օգտատերերի համակարգիչներ և պատճենել կոշտ սկավառակների տվյալները: Բացի այդ, գործակալությունը վնասակար ծրագրերով սպամ է ուղարկել:
Հաղորդվում է, որ վերջին տարիներին գործակալությունը կատարելագործել էր տեխնոլոգիան. լրտեսման օպերացիան իրականացվել է ավտոմատ ռեժիմում՝ առանց մարդու անմիջական մասնակցության:
TURBINE անվանումով հատուկ համակարգը թույլ է տվել ստեղծել լրտեսման ցանց, որի օգնությամբ վերահսկվել են ոչ թե առանձին օգտատերերը, այլ ամբողջական խմբեր:
Պարբերականի տվյալներով՝ Ազգային անվտանգության գործակալությունը նման օպերացիաներ է անցկացրել 2004 թվականից:
