ԱԺ իշխող մեծամասնությունը կողմնակից է քաղաքական դաշտում առողջ պայքարի և ընդդիմության ու իշխանության կողմից քաղաքական օրակարգի ներկայացմանը: Մարտի 13-ին ԱԺ-ում լրագրողների հետ ճեպազրույցում նման տեսակետ հայտնեց ԱԺ փոխնախագահ, ՀՀԿ խոսնակ Էդուարդ Շարմազանովը՝ անդրադառնալով ԲՀԿ-ի շուրջ ծավալվող կոնսոլիդացման գործընթացին:
Նա չբացառեց, որ հայաստանյան քաղաքական դաշտը կարող է գնալ կուսակցությունների խոշորացման ճանապարհով, լինեն երկու բևեռ, որոնցից մեկը վստահաբար ՀՀԿ-ն է, իսկ մյուսը՝ ավելի փոքր կուսակցությունների համախումբը:
Շարմազանովը նաև անդրադարձավ ՀՅԴ խմբակցության քարտուղար Աղվան Վարդանյանի հայտարարությանը, թե ժամանակին ՀՀԿ-ն է եղել ՀՅԴ-ի մեջ: «Ես խոսում եմ ապագայի մասին, իսկ իմ հարգարժան գործընկերները խոսում են անցյալից: Կարծում եմ՝ պիտի նայենք դեպի ապագան, իսկ ներկան ու ապագան խոստանում են մեզ, որ մենք կարող ենք ունենալ երկբևեռ քաղաքական դաշտ»,- ասաց նա՝ միաժամանակ ընդգծելով, որ այդ բևեռացումը կարող է լինել, կարող է և չլինել. եթե մյուս խմբակցությունները չեն ուզում, ոչ մեկն իրենց չի ստիպում բևեռանալ:
Շարմազանովը տեսակետ հայտնեց, որ դեռ բավական ժամանակ կա թե՛ համախմբվելու, թե՛ այդ նոր՝ համախմբված բևեռի առաջնորդ ընտրելու համար: «Ես կարծում եմ՝ իրենք պետք է որոշեն, ժողովուրդը պետք է որոշի:
Նախ՝ մինչև 2018 թվականը բավական ժամանակ կա, որովհետև մեր համապետական հաջորդ ընտրությունները 2017-ի խորհրդարանական ընտրություններն են, և այդ չորս կուսակցությունները, ցանկացած կուսակցություն ինքը պիտի որոշի՝ ինչպիսի թիմով գնա, ում առաջնորդությամբ»,- ասաց ՀՀԿ ծոսնակը:
«Ես նաև զարմանում եմ իմ այն գործընկերների վրա, ովքեր յոթ երգ գիտեն, յոթն էլ Հանրապետականի մասին է: Ես լուրջ առաջարկ եմ անում, ասում եմ՝ հնարավոր է լինի միավորում ԲՀԿ-ի գլխավորությամբ, մարդիկ ասում են՝ Հանրապետականը նման է KПCC-ի. ես ինչ եմ ասում, իրենք ինչ են ասում: Իմ ասածն այն չէ, թե՝ Հանրապետականը ում կամ ինչի է նման, Հանրապետականը Հանրապետական է, ես իրենց մի բարեկամական խորհուրդ կտամ. եթե իրենք չմիավորվեն «Բարգավաճի» հետ, գուցե վերածվեն պիոներիկների, հոկտեմբերիկների»,- ասաց նա՝ հավելելով, որ այդ ուժերը ԲՀԿ-ին պիտի միավորվեն, քանի որ նախ՝ հենց այդ ուժի հետ են հանդիպումները կայանում, բացի դրանից՝ ԲՀԿ-ն է նրանց շարքում ամենամեծ կուսակցությունը:
