ԱԺ-ն արդեն 4-րդ անգամ Սահմանադրական դատարանի անդամ չընտրեց, 5-րդ անգամ առաջադրվել է Վահե Գրիգորյանի թեկնածությունը: «Առաջին լրատվական»-ի հետ զրույցում իրավագետ Վարդան Այվազյանը կարծիք հայտնեց, որ 4 անգամ մերժումը ցույց է տալիս, որ նախագահի և ԱԺ քաղաքական մեծամասնության միջև կա հակամարտություն: Նրա խոսքով՝ սահմանադրական դատարանը, իր գործառութային առաքելությամբ լինելով երկրի իրավական անվտանգության երաշխավորը, բացարձակապես չպետք է ներգրավվի քաղաքական հարաբերությունների տիրույթում. «ՍԴ-ն՝ իր դատավորներով և գործառույթներով պետք է բացառապես լինի իրավական հարթության մեջ»:
«Տարաձայնությունն ակնհայտ է, այդուհանդերձ, արտառոց չէ թեկնածուներին մերժելը, դա խորհրդարանի իրավունքն է, պատգամավորների իրավունքն է թեկնածուին դեմ կամ կողմ արտահայտվել»,- նշեց «Իրազեկ քաղաքացիների միավորում» ՀԿ ծրագրերի տնօրեն Դանիել Իոաննիսյանը: «Հաշվի առնելով այն, որ Վահե Գրիգորյանի թեկնածությունը առաջադրվել է նաև նախորդ խորհրդարանում, բայց նրա թեկնածությունը չքվեարկվեց, այս լույսի ներքո տրամաբանական կլիներ, որ երբ նոր էր ձևավորվել այս լեգիտիմ խորհրդարանը, նախագահը նորից ներկայացներ նրա թեկնածությունը»,- նշեց Դ. Իոաննիսյանը:
Վ. Այվազյանի դիտարկմամբ՝ մեր Սահմանադրության մեջ առկա են բազմաթիվ դրույթներ, որոնք մեկը մյուսին հակասում են… «Խնդրի լուծումը պարզ է՝ Սահմանադրության անցումային դրույթները ԱԺ-ն կարող է փոփոխել: Այդ դեպքում վեթինգի գործընթացը վերապահվում է ԲԴԽ-ին: Կարող են օրենսդրության մեջ նաև այլ փոփոխություններ կատարվել»,- նշեց իրավագետը՝ հավելելով, որ զտման գործընթացը պետք է ընթանա փուլային տարբերակով, և անհրաժեշտ է, որ առողջացման ծրագիրը լինի համալիր մոտեցմամբ:
Մանրամասն՝ տեսանյութում:
