Աբովյանի համայնքապետի արտահերթ ընտրությունները տեղի կունենան հունիսի 9-ին: «Առաջին լրատվական»-ը հյուրընկալել է Աբովյանի համայնքապետի ընտրություններում առաջադրված թեկնածու Սասուն Գրիգորյանին։
Ի՞նչ տրամադրություն է տիրում Աբովյան քաղաքում, կա՞ լարվածություն «Առաջին լրատվական»-ի հարցին համայնքապետի թեկնածու Սասուն Գրիգորյանը պատասխանեց․ «Լարվածություն կա։ Թեկնածուներից երկուսը՝ գործող քաղաքապետն ու մարզային իշխանության թեկնածուն սարքել են մի խրամատային իրավիճակ՝ իրար գնդակոծելով։ Մեկն ասում է՝ դու թալանել ես, սխալ ես վարվել, չարաշահել ես, մյուսը՝ ես չեմ արել։ Շեղվելով՝ այս ամենը վերածել են ընտրարշավի բուն թեմայից դուրս անձնական պայքարի։ Մենք գնում ենք մեր հունով, և խորհուրդ կտամ, որ դադարեն իրար քարկոծելը և հետ գան։ Մնացել է մի քանի օր, և պետք է ընտրությունները ճիշտ, արդար ու օրինական ճանապարհով հասցնենք իր ավարտին»։
Իսկ ինչո՞վ է պայմանավորված այդ կատաղի պայքարը «Առաջին լրատվական»-ի հարցին համայնքապետի թեկնածուն պատասխանեց․ «Պայմանավորված է նրանով, որ նախկինն այդ ամբողջ մեխանիզմը փորձում է պահպանել։ Գործող քաղաքապետին ԱԺ երեք պատգամավորներ են հովանավորում, և իրենց կատաղի ամբողջ ներուժը մտցրել են քաղաք, որպեսզի ներկայիս քաղաքապետը մնա իր պաշտոնին։ Նորերը, որ եկել են, ասում են, որ իրենք են այս փոփոխություններն արել և իրենք պետք է այդ պտուղները քաղեն։ Սակայն այսքան տարի քաղաքում ոչ մի բան չարած մի խումբ մարդիկ հավաքվել են ու ներկայացնում են իրենց թեկնածուին։ Նշեմ, որ նորերը ոչնչով չեն տարբերվում նախկիններից։ Այս մարդիկ էլ կատաղի պայքար են մղում։ Այն փոփոխությունները, որ եղան անցյալ տարի, հուսով ենք, որ ընտրություններն արդար կանցնեն»։
Սասուն Գրիգորյանը նաև հավելեց․ «Աբովյանը որբի գլուխ չի, որ ով ուզի, գա խուզի, գնա։ Ժողովուրդը թմբիրից դուրս է եկել և լավ է պատկերացնում, թե ինչ է կատարվում այսօր Աբովյանում»։
Մանրամասները՝ տեսանյութում։
