Ամերիկյան Կոլումբիա քաղաքի 29-ամյա բնակիչ (Միսուրի նահանգ) Ռայան Ֆերգյուսոնը դատարանի սխալ վճռով ստիպված է եղել մոտ 10 տարի անցկացնել ճաղերի հետևում: Տղամարդը հայց է ներկայացրել ոստիկանության ու դատախազության դեմ՝ պահանջելով 100 մլն դոլարի փոխհատուցում:
2005 թվականին Ֆերգյուսոնը մեղավոր էր ճանաչվել տեղի թերթերից մեկի մարզական մեկնաբանին սպանելու մեջ և դատապարտվել 40 տարվա ազատազրկման:
Նա դատապարտվել էր ենթադրյալ ականատեսների ցուցմունքների հիման վրա, որոնցից նրանք ավելի ուշ հրաժարվել էին: 2013-ի նոյեմբերին վերաքննիչ դատարանը վճռել էր, որ Ֆերգյուսոնը դատապարտվել է հանցագործության համար, որը չի կատարել: Մեկ շաբաթ անց տղամարդուն ազատ էին արձակել: Այս մասին հայտնում է ITAR-TASS-ը:
Ֆերգյուսոնի փաստաբանները հաստատում են, որ քննիչները միտումնավոր թաքցրել ու ոչնչացրել են ապացույցների մի մասը: Հայցով որպես պատասխանող է անցնում 13 անձ, այդ թվում՝ Կոլումբիայի նախկին դատախազը և մի քանի քննիչներ ու ոստիկաններ:
