«Հայերը խոր արմատներ ունեն Լեհաստանում: Ուկրաինայի և Լեհաստանի հայության համար ունենք ընդհանուր հոգևոր կենտրոն՝ Լվովի առաջնորդանիստ Ս. Աստվածածնի Վերափոխման եկեղեցին: Հաստատվել են և գործում են մի քանի ծուխեր: Մեր հայրենակիցներն ունեն հոգևոր և մշակութային նոր արժեքներ, նաև ժառանգություն»,- «Առաջին լրատվական»-ի հետ զրույցում այս մասին ասաց Ուկրաինայի հայոց թեմի առաջնորդ Տեր Մարկոս եպիսկոպոս Հովհաննիսյանը: -Երախտապարտ ենք այն հայերին, ովքեր մինչ օրես իրենց արմատները չեն մոռանում, խոսում են այդ մասին, փորձում են մեր պատմության տարբեր էջեր լուսաբանել և՛ Լեհաստանի հասարակության, և՛ պետության առջև: Ունենք քաղաքական, մշակութային գործիչներ, ովքեր իրենց ազգային պատկանելությունը պահպանել են, հայտարարել են այդ մասին և կարողանում են հայկականությունը պատշաճ մակարդակով ներկայացնել: Առաջիկայում շատ անելիք ունենք և մեծ կամք՝ ապագային ավելի քաջությամբ նայելու»:
Ցանկացած համայնքային կյանքում անխուսափելի է ուծացումը, ինչպիսի՞ն է եկեղեցու վերաբերմունքը խառնամուսնություններին: Այս հարցին ի պատասխան՝ Տեր Մարկոս եպիսկոպոս Հովհաննիսյանը նշեց. «Խառնամուսնությունները մարդկության կյանքում նորություն չեն, այդ փաստի հետ պետք է հաշվի նստենք: Խառնամուսնությունները որքան մարտահրավեր են, այնքան էլ, թերևս, հնարավորություն, ուստի ամեն ինչ պետք է գնահատենք իրենց արժեքների մեջ՝ ո՛չ առավելություն տանք, ո՛չ էլ դրանցից խուսափենք կամ վախենանք: Պարզապես մենք պետք է մեր աշխատանքով, մեր հայրենասիրական ձգտումներով կարողանանք այդ մարտահրավերը ճիշտ ձևով գնահատել և հաղթահարել, խուսափել հնարավոր չէ»:
Գնահատելով իրավիճակը հետհեղափոխական Հայաստանում՝ մեր զրուցակիցն ընդգծեց, որ միշտ էլ ակնկալվում է, որ ցանկացած փոփոխություն դրական արդյունք պետք է ունենա. «Այսօր էլ աղոթում ենք, աշխատում ենք, որ մեր հայրենիքն օր օրի առաջ գնա: Երբեք դժվարություններից չվախենանք, այլ կարողանանք խնդիրների լուծման ուղիները գտնել»:
Մանրամասն՝ տեսանյութում:
