4-5 տարի անընդմեջ անկումից հետո սպասվում է, որ այս տարի շինարարության ոլորտում վերջապես աճ կգրանցվի: Նման կանխատեսում է արված ինչպես այս տարվա բյուջեում, այնպես էլ Կենտրոնական բանկի (ԿԲ)՝ օրերս հրապարակած զեկույցում:
Ավելին` ԿԲ-ն կանխատեսում է, որ շինարարությունում ավելացված արժեքի աճը պետք է ամենամեծ տոկոսը լինի՝ տնտեսության մյուս ճյուղերի համեմատ: Ընդ որում՝ շինարարության աճը պետք է բերի նաև շինարարական նյութերի արդյունաբերության ընդլայնմանը՝ այդպիսով նպաստելով նաև արդյունաբերության աճին:
Այսպես` արդյունաբերության ճյուղում 2014 թվականին կանխատեսվում է ավելացված արժեքի շուրջ 6-8% աճ, որին, ըստ Կենտրոնական բանկի, հիմնականում կնպաստեն «համաշխարհային շուկաներում գունավոր մետաղների գների ներկայիս մակարդակի պահպանումը և Թեղուտի հանքի շահագործման պարագայում հանքարդյունաբերության և մետաղագործության ակնկալվող աճը», ինչպես նաև նախորդ տարիների ընթացքում սննդի վերամշակման, դեղագործության և էներգետիկայի բնագավառում իրականացված ներդրումների արդյունքում համապատասխանաբար սննդամթերքի, խմիչքի, դեղերի և էլեկտրաէներգիայի արտադրության ծավալների ակնկալվող աճը և «շինանյութերի արտադրության ծավալների աճը` պայմանավորված նախատեսվող շինարարական ծրագրերի իրագործմամբ»:
«Շինարարության ճյուղում 2014 թվականին ակնկալվում է ավելացված արժեքի շուրջ 6.5-8.5% աճ, որին հիմնականում կնպաստեն պետական, համայնքային բյուջեների և միջազգային կազմակերպությունների միջոցների հաշվին իրականացվող ճանապարհների, ոռոգման համակարգի, ջրամատակարարման, հանրապետության հյուսիսային սահմանակետերի և Երևանի մետրոպոլիտենի արդիականացմանն ուղղված շինարարական աշխատանքները»,- ասվում է Կենտրոնական բանկի հաշվետվության մեջ:
Ծառայությունների ճյուղում ավելացված արժեքի իրական աճը կանխատեսվում է 5-6.5%-ի շրջանակներում` հիմնականում պայմանավորված մասնավոր և պետական ծախսումների ակնկալվող աճով, որն անդրադառնալու է ինչպես առևտրաշրջանառության ծավալների, այնպես էլ մատուցված այլ ծառայությունների ծավալների վրա:
Գյուղատնտեսության ճյուղում ավելացված արժեքի իրական աճը 2014թ. կանխատեսվում է 4.5-6.5%-ի շրջանակներում, որին նպաստելու է ինչպես բուսաբուծության, այնպես էլ անասնապահության ենթաճյուղերում ակնկալվող աճը` պայմանավորված վերջին տարիներին պետական և մասնավոր հատվածի կողմից ոլորտում իրականացված ներդրումների արդյունքում ջերմոցային տնտեսությունների ընդլայնմամբ, ցանքատարածությունների, բերքատվության և անասնագլխաքանակի աճով:
2014 թվականին ակնկալվում է նաև տնտեսության միջին անվանական աշխատավարձերի շուրջ 13% աճ՝ 2013 թվականին արձանագրված 6.5% աճի փոխարեն: Տարվա ընթացքում անվանական աշխատավարձերի աճի տեմպերի արագացմանը կնպաստեն նվազագույն աշխատավարձի շեմի բարձրացումը 45.000-ից մինչև 50.000 ՀՀ դրամ և պետական հատվածում զբաղվածների աշխատավարձերի նշանակալի բարձրացումը, որը տեղի կունենա առավելապես տարվա երկրորդ կիսամյակում:
Սպասվում է, որ պետական հատվածի աշխատավարձերի աճը կհանգեցնի մասնավոր հատվածի աշխատավարձերի որոշակի աճի` պայմանավորված երկու հատվածների միջև միջճյուղային մրցակցությամբ:
Այսպիսով, այս ամենի արդյունքում ակնկալվում է, որ տարվա վերջին տնտեսական աճը կլինի 5.4-6.1%-ի միջակայքում: Ընդ որում՝ այդ աճը կարող է ավելի փոքր լինել՝ կախված ինչպես արտաքին զարգացումներից, այնպես էլ ներքին` տնտեսությունում հարկաբյուջետային քաղաքականության իրականացման ընթացքից և մասնավոր ներդրումների վերականգնման տեմպերից:
