«Պետք է ասեմ, որ անցած տարիների ընթացքում տասնյակ, հարյուր հազարավոր քաղաքացիներ ձեռք են բերել Ռուսաստանի քաղաքացիություն: ՌԴ քաղաքացիություն ձեռք բերելը չի նշանակում, որ նրանք մշտապես պետք է բնակվեն այդ երկրում: Դա ավելի շատ այդ երկրում իրենց գտնվելը, ճամփորդությունը դյուրացնող ձև է: Նրանք շարունակում են համարվել մեր միգրանտները»,- «Առաջին լրատվական»-ի հետ զրույցում ասաց Միգրացիոն պետական ծառայության պետ Գագիկ Եգանյանը՝ պատասխանելով հարցին, թե արդյոք վտանգ չի՞ տեսնում ՌԴ քաղաքացիության ստացման դյուրացման գործընթացում:
«Յուրաքանչյուր երկիր իր դեմ ծառացած խնդիրները փորձում է լուծել իր օրենսդրությամբ, այդ թվում՝ միգրացիոն օրենսդրությամբ: Հիմա Ռուսաստանի մոտ խնդիր է առաջացել լուծել որոշակի կատեգորիաների պատկանող քաղաքացիների՝ առավել դյուրացված եղանակով քաղաքացիության ստացման հարցը»,- հավելեց նա:
Գագիկ Եգանյանի խոսքով՝ այսօր էլ, առանց այդ նախագծի, ՀՀ հազարավոր քաղաքացիներ դառնում են ՌԴ քաղաքացի, և դա իր մեջ վտանգ չի պարունակում: «Բայց մյուս կողմից՝ որպեսզի վտանգը տեսնես, պետք է տեսնես, թե դրա կիրառման որոշակի ժամանակում ինչ արդյունքներ են ստացվում: Հիմա վաղ է այդ մասին խոսել»,- ասաց Եգանյանը:
