«Դեմ եմ» նախաձեռնության անդամները շարունակելու են պայքարել՝ չնայած իրենց նկատմամբ ճնշումներին: Մարտի 11-ին լրագրողների հետ հանդիպմանը նախաձեռնության անդամ Արսեն Մանուկյանը տեղեկացրեց, որ իրենք դեռևս մինչև մարտի 7-ի իրենց ակցիան ստացել էին բազմաթիվ նամակներ, որոնցում նշվում էր՝ ֆինանսների նախարարությունից ճնշումներ են գործադրում, ուստի որոշեցին հակազդման ակցիա կազմակերպել:
«Ակցիան տեղի ունեցավ, սակայն ֆինանսների նախարարը չբարեհաճեց իջնել մեզ մոտ, ինքնաբուխ անհնազանդության ակցիա տեղի ունեցավ, փողոցը փակվեց, ոստիկանները բռնի ուժ կիրառեցին, երեքը բերման ենթարկվեցին, այնուհետև ազատ արձակվեցին»,- ասաց նա: Նրա խոսքով՝ եթե Սահմանադրական դատարանը կրկին նեղ շրջանակի շահին հետևեց, ապա դատական համակարգի նկատմամբ վստահությունն իսպառ կվերանա. եթե տասը հոգու շահ է ոտնահարվում և հազարների շահին են վստահում, դրա դեմ ոչինչ չեն ասում, բայց եթե մեծ մասինն է ոտնահարվում, այստեղ արդեն պետք է ապացուցվի, որ ոստիկանի պահանջը օրինական է:
Նախաձեռնության անդամ Հակոբ Արշակյանը տեղեկացրեց, որ շարժման առաջին իսկ օրերից բռնություններ են գործադրվել նախաձեռնության անդամների վրա, նաև հոգեբանական ճնշումներ, իսկ այդ ամենը ոտնձգություն է մարդկանց և նրանց ընտանիքների նկատմամբ, նաև՝ ոստիկանների կողմից:
«Ես հպարտ եմ, որ այնտեղ հավաքված մարդիկ չտրվեցին սադրանքների, մենք ամեն կերպ ցույց ենք տվել, որ մեր ակցիան բռնությունների ուղղված չէ, խաղաղ է: Այն վարչական պատասխանատվությունը, որ փորձում են կիրառել, այդ թվում նաև ինձ վրա, այդ տուգանքները մենք չենք պատրաստվում վճարել»,- ասաց նա:
Շարժման նախաձեռնող խմբի անդամ Գևորգ Գորգիսյանը նշեց, որ իրենք գործում են Սահմանադրության հիման վրա, օրենքի սահմանից դուրս չեն գալիս: Նրա խոսքով՝ Բուզանդի փողոցի անցումով երբ փորձում էին անցնել, ոստիկանների կողմից հրմշտոց է եղել: «Որևէ պաշտոնյայի կողմից խելամիտ չէ, որ ՍԴ-ում գտնվող օրենքի շուրջ ենթադրություններ անի, եթե մեկը թույլ է տալիս ասել, որ մեկ է՝ անելու են, դա ապաշնորհության մասին է խոսում միայն:
Ամսի 22-ին մեծ հանրահավաք և երթ ունենք, ՍԴ-ն մեր պայքարի ուղղություններից մեկն է միայն: Այս օրենքը ոչ միայն հակասահմանադրական է, այլև ապազգային է, հակասոցիալական»,- ասաց նա՝ հավելելով, որ եթե ՍԴ-ն կուլ գնա կառավարական ճնշումներին, երկրի վրա դա կարող է թանկ նստել:
