«Բարգավաճ Հայաստանը», փաստորեն, ձեռնամուխ է եղել կոնսոլիդացիայի այն ծրագրերին, որոնց մասին Գագիկ Ծառուկյանը հայտարարեց կուսակցության վերջին համագումարի ընթացքում: Գագիկ Ծառուկյանը հրավերներ է ուղարկում խորհրդարանական ոչ իշխանական ուժերին, և ՀԱԿ-ն էլ հայտարարել է նման հրավերի մասին: Ըստ որում, ինչպես կարելի է հասկանալ մամուլին Լևոն Զուրաբյանի տված բացատրություններից, ՀԱԿ-ը հանդիպման կգնա առանց Լևոն Տեր-Պետրոսյանի:
ԲՀԿ-ի այս նախաձեռնությունը կարելի է որակել որպես ընդդիմադիր դաշտում առաջատարությանն ուղղված գործնական մի փուլի մեկնարկ: Հետաքրքրական է այստեղ այն, թե բացի խորհրդարանական ոչ իշխանական կոչված ուժերից, ԲՀԿ-ն էլ ինչ կուսակցությունների և միավորների է հանդիպման հրավերներ ուղարկելու: Սակայն այս հրավերներից ավելի հետաքրքրական է այն, թե ինչ է առաջարկում ԲՀԿ-ն այս կուսակցություններին: Առաջարկների մասով իրավիճակը կարծեք թե մշուշոտ է, այսինքն՝ չի երևում կոնկրետ առաջարկ, որը ԲՀԿ-ն տեսնում է կոնսոլիդացիայի հիմքում:
Ասել, որ կոնսոլիդացիա է տեղի ունենում հանուն հայրենիքի փրկության, նշանակում է՝ ոչինչ չասել, որովհետև հայրենիքի փրկության համար կոնսոլիդացիայի մասին բոլորն են խոսում: Եվ այս առումով տարբերվելու, առանձնանալու համար ԲՀԿ-ն պետք է ավելի կոնկրետանա, ինչպես որ պետք է կոնկրետանա ցանկացած այլ քաղաքական ուժ, որը հավակնություն է ներկայացնում լինել ինչ-որ միավորման առանցքում: ՀՅԴ-ի հետ Ծառուկյանի հանդիպումներից պարզ էր մի բան, որ ԲՀԿ առաջնորդն առաջարկում էր շփվել, կասկածները անմիջապես միմյանց հետ շփումներում փարատել և «դատարկ դհոլներից» հեռու մնալ:
Նման օրակարգը առանձնապես «լիքը» օրակարգ որակելը, մեղմ ասած, դժվար է: Մյուս կողմից՝ չի բացառվում, որ ԲՀԿ-ն կոնկրետ առաջարկներ անում է, սակայն ոչ այնպիսի առաջարկներ, որոնք ենթակա են հրապարակման: Ավելի շուտ այն տպավորությունն է, որ տեղի է ունենում մի գործընթաց, որը ոչ այնքան ապագայի միտվածություն ունի, ինչքան հանդիսանում է մինչև այսօր տեղի ունեցող պրոցեսների, քառյակի, այսպես ասած, համագործակցության յուրօրինակ փաթեթավորում:
Երկար ժամանակ է քառյակի համագործակցության մասին է հայտնվում, սակայն այս ընթացքում չի եղել մի որևէ էական հարց, որի շուրջ քիչ թե շատ կոնկրետ պայմանավորվածության մասին հայտարարություն արվի և հետևեն որևէ կոնկրետ գործողություններ: Եվ ահա սկսվում է, այսպես ասած, հանդիպումների շարք, այսինքն՝ այն, ինչ առ այսօր տեղի է ունեցել ոչ նման հրապարակային կամ պաշտոնական կարգով, սկսել է տեղի ունենալ հենց այդպես: Այլ կերպ ասած՝ այն, ինչ տեղի էր ունենում ոչ պաշտոնապես և ոչ նման հանդիսավորությամբ, այսօր ուղղակի ստացել է ինֆորմացիոն նոր ձևակերպում, որն էլ փորձ է արվում մատուցել նոր գործընթացի փոխարեն, անարդյունավետությունը ծածկելու նպատակով: Տեխնոլոգիան, ի տարբերություն բովանդակության, այս դեպքում իհարկե առավել քան հասկանալի է: Ավելին՝ բովանդակության խնդիր միգուցե և չկա էլ:
Բանն այն է, որ բովանդակային առումով քառյակի տարբերություններն իսկապես ահռելի են և հակասական, ինչքան էլ որ նրանք հայտարարում են միասնական մոտեցումների մասին: Բովանդակությունը միայն ու միայն կարող է խանգարել տեխնոլոգիական կողմին, այդ իսկ պատճառով այն մի կողմ է դրվել: Խնդիրը, սակայն, այն է, որ հասարակությունն այս ընթացքում բավական հասունացել է և չի ստացվում մարդկանց տեխնոլոգիաներով շեղելը, քանի որ ոչ մի կերպ աչք չեն կտրում բովանդակությունից և անընդհատ անհարմար հարցեր են տալիս՝ բովանդակային մանիպուլյացիաները ավելի ու ավելի բացահայտելով:
