Ապրիլի 21-ին «Ժամանակ» օրաթերթը և «Առաջին լրատվականը» հրապարկել էին հայտնի գործարար Միխայիլ Բաղդասարովի հետ անցկացրած հարցազրույցը: Հիշեցնենք, որ հարցազրույցում Միխայիլ Բաղդասարովը իր փորձից ելնելով նշում էր, որ Հայաստանում բիզնեսը մարզվում է: Եթե այստեղ կարողացար երկար աշխատել, ուրեմն արտերկրում կարող ես բիզնեսից մեծ շահույթներ ստանալ:
«Այստեղ մարզվում ենք: Եթե Հայաստանում մարդը գոյատևում է աշխատելով զրոյով կամ փոքր պլյուսով, ուրեմն դրսում կկարողանա հսկայական շահույթով աշխատել: Ավելին՝ Եվրոպայում, առհասարակ արտերկրում հարկերը քիչ են, իսկ շահույթը՝ շատ: Հայաստանի առկա պայմանները պայմանավորված են նաև նրանով, որ Հայաստանը նպաստավոր պայմաններում չի գտնվում՝ թե’ ֆինանսատնտեսական առումով, թե’ շրջափակման և այլն, և այլն»,- նշել էր Միխայիլ Բաղդասարովը:
Այսօր հրավիրված ասուլիսի ընթացքում «Ազատություն» ռադիոկայանի լրագրողը, մեջբերելով նրա այս պատասխանը, հարցրեց՝ շարունակո՞ւմ է նույն կարծիքին մնալ, ինչին գործարարն արձագանքեց . «Իհարկե ասել եմ, բայց ոչ այն ձևով, ինչպես թերթը ներկայացրել է: Հայաստանում ինտելեկտուալ պոտենցիալը բարձր է: Հետևաբար բիզնես անելը ավելի դժվար է, քան ավելի քիչ ինտելեկտուալ պոտենցիալ ունեցող երկրներում: Հայաստանի հետ կարող է համեմատվել Իսրայելը, որտեղ նույնպես ինտելեկտուալ մակարդակը բարձր է: Երբ դու նորմալ աշխատում ես Հայաստանում ու Իսրայելում, քեզ համար ավելի հեշտ է աշխատել այնպիսի երկրներում, որոնք այսպես հագեցած չեն ինտելեկտուալ պոտենցիալով, ինչպես Հայաստանն է: Հայերը, ինչպես հրեաները, ավելի նախաձեռնող են: Դրա մասին են խոսում նաև արդյունքները, որովհետև հայերն ու հրեաները, երբ գտնվում են արտերկրում, հասնում են շատ լուրջ արդյունքների՝ դառնում են միլիարդատերեր, գիտնականներ, լավ երաժիշտներ, լավ շախմատիստներ»:
Հարկ ենք համարում ընդգծել, որ մեր գործելաոճի համաձայն՝ Միխայիլ Բաղդասարովի հարցազրույցը ներկայացվել է իր իսկ պատասխանների հիման վրա՝ առանց փոփոխությունների, ինչից ինչ-ինչ պատճառներով գործարարը փորձում է հետ կանգնել:
