Մալաթիա-Սեբաստիա վարչական շրջանի ընդհանուր իրավասության դատարանում Տիգրան Պետրոսյանի նախագահությամբ սկսվում է Վահան Բդոյանի և Դավիթ Ադամյանի գործի դատական քննությունը:
Ըստ մեղադրանքի՝ Վահան Բդոյանը որոշել է ամուսնության նպատակով առևանգել իր նախկին ընկերուհուն: Առևանգումը կատարելու համար նա նախնական համաձայնության է եկել իր ընկեր Դավիթ Ադամյանի հետ:
2013 թվականի դեկտեմբերի 13-ին, ժամը 24-ի սահմաններում 21-ամյա Վահանը 24-ամյա Դավիթի ավտոմեքենայով գնացել է աղջկա վարձակալած բնակարան, որտեղ երիտասարդները բռնություն գործադրելով աղջկա նկատմամբ՝ բացահայտ առևանգել են նրան, նույն ավտոմեքենայով տեղափոխել Բդոյանի շենք, բայց շենքի բակում նրանց դիմավորել են ոչ թե հարսանքավորները, այլ ոստիկանության աշխատակիցները:
Երկու ընկերներին մեղադրանք է առաջադրվել առևանգման համար՝ ՀՀ քրեական օրենսգրքի 131 հոդվածի 2-րդ մասի 1-ին կետով:
Վահան Բդոյանի և Դավիթ Ադամյանի նկատմամբ որպես խափանման միջոց կիրառվել է գրավը:
