«Ընդդեմ իրավական կամայականության» ՀԿ նախագահ Լարիսա Ալավերդյանը, իրավապաշտպան Արտակ Զեյնալյանը և փաստաբան Արայիկ Ղազարյանը պատրաստվում են հայցով դիմել Մարդու իրավունքների եվրոպական դատարան՝ պահանջելով վերականգնել Ադրբեջանում ավելի քան մեկ ամիս գերության մեջ պահված, խոշտանգումների ենթարկված և օրերս Հայաստան վերադարձված 77-ամյա գերի Մամիկոն Խոջոյանի իրավունքները: «Առաջին լրատվական»-ի հետ զրույցում այս մասին ասաց իրավապաշտպան Արտակ Զեյնալյանը՝ հավելելով, որ իրենց մարտավարությունը և փաստաբանական գաղտնիությունը չբացահայտելու համար չի պատրաստվում հետագա քայլերը հրապարակայնացնել:
«Մեր համոզմամբ՝ տեղի է ունեցել խոշտանգումներից զերծ լինելու իրավունքի միջամտություն: Մամիկոն Խոջոյանը գտնվել է անազատության մեջ, միջամտել են նրա անձնական ազատության և անձեռնմխելիության իրավունքին, և այս ամենը նրա էթնիկ պատկանելության պատճառով: Իսկ սա խտրականության դրսևորում է: Հենց այս հիմքերով փորձում ենք հայց նախապատրաստել և դիմել ՄԻԵԴ»,- ասաց իրավապաշտպանը:
Անդրադառնալով ՄԻԵԴ-ում նմանօրինակ նախադեպերին և դրանց հանգուցալուծմանը՝ Արտակ Զեյնալյանը նշեց, որ իրենց կողմից նախապատրաստվող գանգատն «ունիկալ» չէ: «Այդպիսի գործեր այնտեղ շատ կան, և մենք օգտվելու ենք ՄԻԵԴ-ի նախադեպային իրավունքից: Դատարանից ակնկալելու ենք իրավունքի խախտման փաստի ճանաչում և գուցե նաև արդարացի դրամական փոխհատուցում: Սա, իհարկե, երկրորդական, երրորդական խնդիր է: Ամբողջ խնդիրն այն է, որ ճանաչվի Մամիկոն Խոջոյանի իրավունքների խախտումը, և միջամտող պետությունը, այս դեպքում Ադրբեջանը վերացնի այդ խախտումները, հետագայում չկրկնելով դրանք»,- ասաց իրավապաշտպանը՝ միաժամանակ հավելելով, որ վերջնականապես չեն որոշել՝ ներկայացնելո՞ւ են արդյոք արդարացի փոխհատուցման պահանջ, թե՞ ոչ: «Հնարավոր է՝ նման պահանջ ներկայացնենք գործի որոշակի փուլում, երբ միջամտող պետությունը ծանուցվի գործին»,- ասաց Արտակ Զեյնալյանը:
«Ընդդեմ իրավական կամայականության» ՀԿ նախագահ Լարիսա Ալավերդյանն էլ «Առաջին լրատվական»-ի հետ զրույցում ասաց, որ օրերս տեսակցել է ադրբեջանական գերությունից վերադարձված Մամիկոն Խոջոյանին: «Նրա հարազատները համաձայնություն են տվել՝ ՄԻԵԴ դիմելու մեր նախաձեռնությանը: Այժմ սպասում ենք, տեսնենք՝ Մամիկոն Խոջոյանի վիճակը լավանո՞ւմ է: Նա պետք է անմեղսունակ ճանաչվի՝ հարազատների հետ միասին դառնալով տուժող կողմ: Ես եղել եմ դատախազությունում: Նշանակված է դատաբժշկական փորձաքննություն, որն էլ կպարզի Մամիկոն Խոջոյանի խոշտանգումների աստիճանը: Միաժամանակ, շատերին թվում էր, որ նա հաշվառման կանգնած է եղել, այնինչ Խոջոյանի՝ Ադրբեջանում գտնվելու ընթացքում տեղեկացել եմ, որ գերին պարզապես հոգեբանական խնդիրներ է ունեցել, բայց հաշվառման կանգնած չի եղել: Այսինքն՝ Խոջոյանը զուտ հոգեկան հիվանդություն չի ունեցել: Եթե հիմա նրա մոտ հոգեկան խանգարում հայտնաբերվի, դա առավել ծանրացուցիչ հանգամանք կդիտարկվի»,- ասաց Լարիսա Ալավերդյանը:
Հիշեցնենք, որ ադրբեջանական կողմը գերեվարված 77-ամյա Խոջոյանին «դիվերսանտ» էր հայտարարել: Սա հարուցել էր անգամ ադրբեջանական վերլուծական շրջանակների ծիծաղը:
Տավուշի մարզի Վերին Կարմիրաղբյուր գյուղի բնակիչ Մամիկոն Խոջոյանը գերությունից վերադարձվել էր մոտ մեկ ամիս Ադրբեջանում մնալուց հետո:
