ՀՀ սփյուռքի նախարար Հրանուշ Հակոբյանը այսօր լրագրողներին ասել է, որ արտագաղթը մեծացել է, վերջին երեք տարվա մեջ առաջին անգամ իրենք «մինուսով» են փակել: Արտագաղթի ակտիվացումը նախարարը հիմնականում պայմանավորել է սոցիալ-տնտեսական բարդություններով:
«Ես այն կարծիքի եմ, որ Ռուսաստանի տարածք մեկնող մեր հայրենակիցները ժամանակավոր աշխատանքային միգրանտներ են, որոնք ոչ թե գնում են հավերժ, այլ գնում են աշխատանքի և իրենց ընտանիքը պահելու»,- ասել է Հրանուշ Հակոբյանը: Դրա համար, ըստ Հրանուշ Հակոբյանի, պետք է ակտիվացնել սփյուռքահայերի կողմից ներդրումային քաղաքականությունը. «Դրսում բարձր խոսում են դրա մասին, ճիշտ կլինի՝ կոնկրետ գործերով օգնեն, որ այստեղ աշխատատեղեր լինեն»,- ասել է նախարարը:
Նա հիշեցրել է, որ այս տարի կառավարության համար գերակա ուղղություն է համարվել գյուղատնտեսությունը, ներդրումներ են կատարվում այս ուղղությամբ: Գյուղացիների հետ շփման արդյունքում նախարարը վերջերս պարզել է, որ գյուղացիները սկսել են հատկապես անասնապահության գլխաքանակի ավելացման ուղղությամբ աշխատանքները ակտիվացնել.
«Ուղղակի պետք է աշխատել, որ արտագաղթը հնարավորինս կրճատվի, իսկ մեր խնդիրը ներգաղթի կազմակերպման քարոզչության ակտիվացման խնդիրներն են, և այսօր պետք է ասել՝ նման միտումներ կան, որ Հայաստան գալիս են նաև մշտական բնակության համար»,- ասել է Հրանուշ Հակոբյանը:
