ՀՀ սփյուռքի նախարար Հրանուշ Հակոբյանը, ամփոփելով 2011 թվականի առաջին կիսամյակը, նշել է երեք գերակա խնդիրները՝ հայապահպանությունը սփյուռքում, սփյուռքի ներուժի օգտագործումը Հայաստանի զարգացման համար, հայրենադարձության ծրագրերի մշակման և իրականացման խթանումը:
Այս տարի որպես հայապահպանության գլխավոր թիրախ են համարել երիտասարդությունը: Դրա համար 2011-ը երիտասարդության տարի են անվանել և իրականացնում են մի շարք ծրագրեր, այդ թվում՝ ԵՊՀ-ի հետ միասին իրականացում են «Երիտասարդ լրագրողների դպրոցը», որին մասնակցում է 19 լրագրող 10 երկրից: Համահայկական երիտասարդական խորհրդարան է ստեղծվում Facebook-ում, որտեղ 700 և ավելի երիտասարդներ են համախմբված, որոնք քննարկում են երիտասարդական տարբեր խնդիրներ:
Բացի այդ՝ կազմակերպվել է «Կտոր մը հայրենիք» համահայկական երիտասարդական մրցույթը, որտեղ երիտասարդները հետազոտական աշխատանքներ են ներկայացնում՝ նվիրված անկախության 20-ամյակին, նաև ՀԿ-ների միջև մրցույթ են հայտարարել՝ հայ երիտասադրությանը ներգրավելով հայկական կազմակերպությունների մեջ:
Այս տարի իրականացնում են նաև՝ «Հայրենիք, քեզ այսպես եմ տեսնում» մրցանակաբաշխություն աշակերտների շրջանում. ինչպես են մեր երեխաները պատկերացնում Հայաստանը՝ անկախ նրանից՝ եղել են Հայաստանում, թե ոչ: Հրանուշ Հակոբյանի խոսքերով՝ աշխատանքներ են իրականացնում հայրենադարձության, սփյուռքում մայրենի լեզվի պահպանության ուղղությամբ:
