Օրերս մեկնարկած մարտիմեկյան դատավարության գործընթացը, որը դեռ չի էլ անցել բուն գործին, այլ դիտարկում է երկրորդ նախագահ, մեղադրյալ Ռոբերտ Քոչարյանի խափանման միջոցի հարցը, իրավաքաղաքական իր հայտնի նրբերանգներով հանդերձ՝ գործնականում կարևորագույն մի ելակետ է Հայաստանի համար: Խոսքն այն մասին է, որ գործը Հայաստանում մինչև 2018 թվականի ապրիլ-մայիս ժամանակահատվածում իշխած համակարգի համապարփակ ռենտգենն է, լինելու է այդպիսին՝ անխուսափելիորեն բացահայտելով Հայաստանի հետ անկախությունից կամ պատերազմի ավարտից կարճ ժամանակ անց սկսվածի և տեղի ունեցածի ամբողջ հրեշավորությունը:
Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Արթուր Սաքունցը, փաստաբան Ալեքսանդր Սիրունյանը և քաղաքագետ Արմեն Հովհաննիսյանը:
Հարցին, թե ով և ինչու է թեժացնում ընդամենը մի քանի օր առաջ մեկնարկած դատավարությունը, Արթուր Սաքունցը պատասխանեց, որ այդպես էլ պետք է լիներ՝ այսպիսի գործի դատավարությունը չէր կարող թեժ չլինել. «Սա երկար սպասված այն գործերից մեկն է, որը, ըստ էության, անպատժելիության հաղթահարման քայլերից մեկն է»:
Իրավապաշտպանի խոսքով՝ մարտիմեկյան մի շարք դատավարություններ պետք է լինեն. սա ընդամենը մի էպիզոդն է՝ սահմանադրական կարգի տապալումը՝ զինված ուժերի ներգրավմամբ. «Մարտի 1-ին նախորդել է մի ամբողջ գործընթաց, դա զարգացումների ամբողջացումն էր: Մարդիկ, ովքեր հարցաքննվել են այդ գործի շրջանակներում, առնչություն ունեն թե՛ մինչև Մարտի 1-ը տեղի ունեցած իրադարձություններին, երբ որ հետապնդման են ենթարկվել, թե՛ դրանից հետո: Այդ առումով այս գործը հանրային ուշադրության կենտրոնում չի կարող չգտնվել: Վճռվում է կարևոր հարց. դատարանն ի վիճակի՞ է լինելու հիմնավոր, օբյեկտիվ գնահատական տալու այդ ամբողջ երևույթին: Այս դատավարությունը պետք է ընթանա առանց սխալվելու իրավունքի: Ակնհայտ է, որ Ռոբերտ Քոչարյանը և նրա պաշտպանական կողմը սադրում են՝ կեղծ տեղեկություններով, իրավական մանիպուլյացիաներով»: Իրավապաշտպանի դիտարկմամբ՝ այս գործի շրջանակներում պետք է տեղի ունենա նաև մարդու իրավունքների զանգվածային խախտման հիմքով դատավարություն:
Արմեն Հովհաննիսյանի խոսքով՝ բարդ խնդիր է, թե ինչ անել, որ դատավարությունը չշեղվի իրավական ճանապարհից, այն դեպքում, երբ մի կողմը հստակ նպատակադրված է շեղել, և այդ պրոցեսին նպաստում են և՛ իրավաբաններ, և՛ ԶԼՄ-ներ:
Ալեքսանդր Սիրունյանի խոսքով՝ բանակը ներքաղաքական գործընթացներին ներգրավելը իրավաչափ չէ. «Իրավունք չունեն: Քոչարյանն ասում է՝ իսկ ո՞ր երկրում է, որ եթե պետք է լինում, բանակը չեն ներգրավում: Չկա նման երկիր: Դրա համար կան ոստիկանության զորքեր: Բայց ինքս ականատես եմ եղել, մեր բակում մենք բանակային համազգեստով տուժած տղաների ենք օգնություն ցույց տվել»:
Փաստաբանն ընդգծեց, որ հանրահավաքները սպառնալիք չեն երկրի համար. «Օպերայի միտինգը արտաքին վտա՞նգ է»: Ա. Սաքունցը հավելեց, որ փետրվարի19-ից մինչև Մարտի 1-ը ցույցերը, երթերը, հանրահավաքները եղել են բացառապես խաղաղ: «Ամեն ինչը սկսվեց Մարտի 1-ի առավոտյան, երբ խաղաղ ցուցարարների նկատմամբ կիրառվեց անհիմն, ոչ համաչափ ուժ,- նշեց իրավապաշտպանը:- Քոչարյանը մոռանում է, որ փետրվարի 26-ին հայտարարեց, որ շատ-շատերը բանտերում են հայտնվելու, երկար ժամանակով ազատազրկվելու են: «Միակ տղամարդը» լինելով՝ թող տղամարդկություն ունենա իր ասածները հիշելու»:
Մանրամասն՝ տեսանյութում: