Այսօր ՀԱԿ քաղխորհրդի անդամ Զոյա Թադևոսյանը, անդրադառնալով Գագիկ Ծառուկյան և Իվանիշվիլի համեմատություններին, նշեց, որ դիմագծային նմանությունները այստեղ անընդունելի են, և որևէ մեկս մանրամասն չենք ուսումնասիրել Իվանիշվիլիին՝ մանկությունից սկսած մինչև մեր օրերը. «Մենք չգիտենք՝ Ծառուկյանը որտեղ է թալանել, որտեղ՝ ոչ, առավել ևս, անմեղության կանխավարկածի համաձայն, որևէ մեկս չգիտի՝ այդ բռնաբարությունը տեղի ունեցե՞լ է, թե՞ ոչ: Գոյություն ունեն ԿԳԲ, տարբեր աղբյուրներ, որոնք կարող են բացահայտել իրական կերպարը, հանրության հետ փաստերով խոսել»:
Զոյա Թադևոսյանի խոսքով՝ եթե Ծառուկյանը թալանել է, ապա կան դրա հակառակորդները, որոնք կարող են այդ փաստերը մեր առջև դնել: Նրա թալանի հետ կապված որևէ մեկը ինձ փաստ չի ներկայացրել:
«Այն, որ Գագիկ Ծառուկյանը լայնամասշտաբ մարդասիրական գործունեություն է իրականացնում՝ կարծես թե դրա մասին բոլորը ուզում են լռել: Իսկ գուցե ցույց տաք Հայաստանում մի օլիգարխի կամ մեծահարուստի, ով իր ձեռքը գրպանն է տանում, մի ուսանողի տասը դրամ է տալիս, որ այդ ուսանողը այդ տասը դրամն իր կարիքների համար ծախսի»,-ասաց Զոյա Թադևոսյանը:
Նրա խոսքով՝ չկա մարդ, որ իր կյանքում որևէ մեղք գործած չլինի, մարդը չգիտի՝ տարիներ անց իր կենսագրությունը ինչ բովանդակություն կստանա… մանկություն, պատանեկություն… սխալվում են բոլորը, բայց ամենակարևորը սխալը հասկանալն ու սխալ ճանապարհից հետ կանգնելն է:
«Եթե մարդը ազատության մեջ որոշում է ինքնամաքրվել, բոլորով հավաքվենք դատափետե՞նք մարդուն»,- ասաց նա:
Խոսելով Տեր-Պետրոսյանի և Քոչարյանի տարբերությունից՝ նա նշեց, որ Տեր-Պետրոսյանը որևէ մեկին կրակելու հրաման չի տվել, նրա ձեռքերը արյունոտ չեն, նա տաղանդաշատ գիտնական է, մեծ մարդ, նա արժանապատվություն ունեցող մարդ է, ում ասացին՝ հրաժարական տուր, և նա տվեց այդ հրաժարականը:
