Գերմանիայի կանցլեր Անգելա Մերկելը սպառնացել է Մոսկվային վերանայել ԵՄ-ի և Ռուսաստանի միջև հարաբերությունները, եթե ռուսական կողմը շարունակի Ուկրաինայում իրադրության ապակայունացման տանող միջոցառումների ընդունումը: Այս մասին փոխանցում է Deutsche Welle-ն:
Եթե Մոսկվան Ղրիմում ռազմական օպերացիաներ անցկացնի, ապա դա կհանգեցնի ԵՄ-ի ու Ռուսաստանի միջև հարաբերությունների արմատական փոփոխության, հայտարարել է կանցլերը հինգշաբթի Բրյուսելում կայացած ԵՄ արտահերթ գագաթնաժողովից հետո:
Մերկելը պարզաբանել է, որ այդ դեպքում Ռուսաստանի դեմ կարող են ներմուծվել տնտեսական պատժամիջոցներ, չնայած, նրա խոսքով՝ ԵՄ-ն դա չի ցանկանում:Դաշնային կանցլերը հրաժարվել է հստակեցնել, թե կոնկրետ ինչ տնտեսական միջոցառումներ կարող են ընդունվել Ռուսաստանի դեմ:
Գերանիայի կառավարության ղեկավարը նաև հայտարարել է, որ ԵՄ-ն անօրինական է համարում Ղրիմում ծրագրված հանրաքվեն: Մերկելն ընդգծել է, որ այդ հանրաքվեն «անհամատեղելի է Ուկրաինայի սահմանադրության հետ»:
Կանցլերի խոսքով՝ ԵՄ-ն մտադիր է հնարավորինս շուտ ստորագրել Ուկրաինայի հետ Ասոցացման մասին համաձայնագրի առաջին՝ քաղաքական մասը:
