Անջելինա Ջոլին և Սառա Ջեսիքա Փարքերը 2010 թ. մայիսից մինչև այս տարվա մայիս վաստակել են 30-ական միլիոն դոլար և համարվում են Հոլիվուդի ամենաշատ վարձատրվող դերասանուհիները: Ամեն տարի վարկանիշային այս ցուցակը հրապարակում է Forbes ամսագիրը:
Անջելինա Ջոլին նման հաջողություն արձանագրել է շնորհիվ «Սոլթ» և «Զբոսաշրջիկը» ֆիլմերի («Զբոսաշրջիկում» նա խաղացել է Ջոնի Դեպի հետ): Երկու ֆիլմերը, չնայած մեծ ժողովրդականություն չեն վայելել, ԱՄՆ վարձույթում հավաքել են 300 և 280 միլիոն դոլար՝ համապատասխանաբար:
Սառա Ջեսիքա Փարքերին, ինչպես միշտ, օգնել է հայտնի «Սեքսը մեծ քաղաքում 2» ֆիլմը: «Մարդիկ երևի զարմացած են, քանի որ չեն գիտակցում, որ, բացի նկարահանումներից, Փարքերը լավ գումար է վաստակում իր օծանելիքների վաճառքից և գովազդից»,- ասել է այս ցուցակը կազմող Դորոթի Փոմերանցը:
Անցած տարի այս ցուցակը գլխավորող Սանդրա Բալոքն այս տարի 9-րդ հորիզոնականում է` 15 միլիոն դոլարով: Հնգյակում են Ջենիֆեր Անիստոնը (28 մլն դոլար), Ռիզ Ուիզերսփունը (28 մլն), Ջուլիա Ռոբերթսը (20 մլն):