Այսօր պաշտպանության նախարությունում կանանց տոնին նվիրված միջոցառում էր, որի ժամանակ մի շարք կին ազատամարտիկներ, ազատամարտիկների ու հերոսների այրիներ ու զավակներ պարգևատրվեցին մեդալներով, շքանշաններով և շնորհակալագրերով:
Ջիվան Աբրահամյանի, Վիտյա Ալավերդյանի մայրերի, Մովսես Գորգիսյանի այրու, Թաթուլ Կրպեյանի դստեր հետ այսօր պաշտպանության նախարարի կողմից «Դրաստամատ Կանայան» մեդալով պարգևատրվեց նաև Երևանի Վալերի Բրյուսովի անվան լեզվաբանական համալսարանի ռեկտորի խորհրդական Հասմիկ Ափյանը:
«Առաջին լրատվական»-ը վերջինից հետաքրքրվեց, թե հատկապես ինչի համար նա պարգևատրվեց «Դրաստամատ Կանայան» մեդալով: «Բանակի օրերին ընդառաջ պաշտպանության նախարարը մեր բուհում էր, և մեր բուհի անձնակազմից բանակ-հասարակություն կապի խթանման համար պարգևատրում իրականացվեց»,- ասաց Հասմիկը: Հետաքրքրվեցինք նաև, թե ինքը հատկապես ինչ է արել այդ կապի խթանման համար, ինչ ներդրում ունի բանակ-հասարակություն կապի խորացման գործում: «Բազմաթիվ միջոցառումներ, ծրագրեր»,- ասաց նա: Իսկ երբ խնդրեցինք ավելի հստակեցնել, թե ինչ «բազմաթիվ միջոցառումներ, ծրագրեր են իրականացրել»՝ Հասմիկը հրաժարվեց պատասխանել, ասաց, որ ցանկանում է միջոցառումը լսել:
Պարզապես նշենք, որ ըստ Պետական պարգևների մասին ՀՀ օենքի՝ ՀՀ զինված ուժերի «Դրաստամատ Կանայան» մեդալով պարգևատրվում են բանակաշինության, ՀՀ ռազմակրթական համակարգի զարգացման և մատաղ սերնդի ռազմահայրենասիրական դաստիարակության բնագավառում նշանակալի ներդրում ունեցող սպաները և ենթասպաները, ժամկետային ծառայության ընթացքում հայրենիքի սահմանների պաշտպանության, զինծառայողների կյանքին սպառնացող վտանգը վերացնելու գործում անձնական խիզախություն ցուցաբերած զինծառայողները, Հայկական բանակի կայացման և ամրապնդման գործում զգալի ավանդ ունեցող անհատները:
