Այսօր «Հայելի» ակումբում ԿԳՆ նախնական և միջին մասնագիտական կրթության վարչության պետ Ռոբերտ Աբրահամյանը և մասնագիտական կրթության և ուսուցման փորձագետ Մարինե Հակոբյանը մամլո ասուլիսի ժամանակ քննարկում էին «Միջին մասնագիտական կրթության համակարգի /քոլեջներ, արհեստագործական ուսումնարաններ/ հիմնախնդիրները» ծրագրերը:
«Կրթության բոլոր մակարդակները պետք է «պետական պատվեր» հասկացությունը զգան իրենց բոլոր չափորոշիչների շրջանակներում: Կադրը կրթության արդյունքում պետք է ոչ թե տեսաբան լինի, այլ կատարող: Մեր ուսումնական հաստատությունները այդքան էլ պատրաստ չէին տեսական մակարդակից անցնել գործնականի: Խնդիրն այն է, որ ուսումնական հաստատությունը պետք է ունենա լաբորատոր բազա, պետք է ունենա շենքային պայմաններ, պետք է ունենա պայմանագիր այն կազմակերպությունների հետ, որտեղ իր շրջանավարտը վաղը պետք է աշխատի»,- ասաց տիկին Հակոբյանը:
Մարինե Հակոբյանն նշեց նաև, որ գործատուն է անմիջական պատվիրատուն, որ գործատուն է առաջարկող օղակը, գործատուն է, որ պետք է գնահատի նաև կրթության որակը:
Պարոն Աբրահամյանը նշեց, որ շատ կարևոր է պետություն և բիզնես կապը: «Բարեփոխումները միջին մասնագիտական ոլորտում ուղղված են հենց սպասարկման ոլորտը զարգացնելուն. այս բարեփոխումների արդյունքում կունենանք այնպիսի որակյալ կրթություն տվող միջին մասնագիտական հաստատություններ, որտեղ հնարավոր կլինի ստացած կրթությամբ կարողանալ բարձր վարձատրվող աշխատանք գտնել»,- ասաց պարոն Աբրահամյանը: