Կենտրոն և Նոր Նորք վարչական շրջանների ընդհանուր իրավասության դատարանում Մնացական Մարտիրոսյանի նախագահությամբ ավարտվեց Արմեն Դավթյանի գործի դատավարությունը:
Ըստ առաջադրված մեղադրանքի՝ ՀՀ դատական դեպարտամենտի աշխատակից, ՀՀ վճռաբեկ դատարանի քաղաքացիական պալատի դատավոր Արտակ Բարսեղյանի օգնական, 43-ամյա Արմեն Դավթյանը Վճռաբեկ դատարանում ստացված քաղաքացիական գործի նյութերին ծանոթանալու ընթացքում գայթակղվել է ու նպատակադրվել խաբեության միջոցով հափշտակել որպես բողոքի պետտուրք փոխանցված գումարը՝ 5 միլիոն 154 հազար 484 դրամ:
Դատավորի օգնականը կեղծել է բանկի ձևաթուղթը, օգտագործել ՀՀ դատական դեպարտամենտի ձևաթուղթը, կեղծել համապատասխան ստորագրությունները, 5 միլիոն 154 հազար 484 դրամը փոխանցել է տվել ընկերոջ կնոջ հաշվեհամարին, ով գումարը ստացել ու ամբողջությամբ հանձնել է Արմենին:
Մի քանի օր հետո Արմենը հափշտակած գումարը նույն կնոջ հաշվեհամարի միջոցով հետ է փոխանցել:
Արմեն Դավթյանը մեղավոր է ճանաչվել կեղծ փաստաթղթեր պատրաստելու և դրանց օգտագործման միջոցով խարդախության եղանակով գումար հափշտակելու համար՝ ՀՀ քրեական օրենսգրքի 325 հոդվածի 1-ին մասով և 178 հոդվածի 3-րդ մասի 1-ին կետով:
Արմեն Դավթյանն իրեն լիովին մեղավոր է ճանաչել:
Մեղադրող Արմեն Փանոսյանը միջնորդել էր Արմեն Դավթյանին վերջին հաշվով դատապարտել 5 տարի 6 ամիս ազատազրկման:
Արմեն Դավթյանի շահերի պաշտպանը և ինքը՝ Արմեն Դավթյանը խնդրել էին պայմանական դատապարտություն կիրառել:
Ընդհանուր իրավասության դատարանը հրապարակեց դատավճիռը, որով Արմեն Դավթյանը դատապարտվեց 4 տարի ազատազրկման և 200 հազար դրամ տուգանքի:
