Երթևեկությունը վերահսկող տեսախցիկների շնորհիվ վարորդները, իհարկե, ավելի կարգապահ են դարձել, սակայն տուգանքներն այնքան են շատացել, որ դրանց հանդեպ քաղաքացիներն ատելություն են տածում: Այօր տեղի ունեցած մամուլի ասուլիսի ժամանակ այս մասին ասաց «Ավտովարորդների պաշտպանության լիգայի» նախագահ Տիգրան Հովհաննիսյանը:
«Եթե մենք լուսարձակի կարմիր ազդանշանի տակ խախտում ենք գծանշանը, ապա նույն պահին էլ հետ ենք գնում, սակայն, միևնույն է, տուգանվում ենք: Սրա դեմ պետք է քայլեր ձեռնարկվեն: Քայլեր պետք է ձեռնարկվեն նաև տուգանքների չափի և դրանց համապատասխան գանձումներ կատարելու հարցում: Նվազագույն գերազանցման դեպքում, ասենք, 5 հազար դրամ, արագության գերազանցման առավել կոպիտ խախտումների դեպքում՝ 10 կամ 15 հազար դրամ»,- ասաց նա`հավելելով, որ տեսախցիկները դարձել են բիզնեսի տեսակ:
Տիգրան Հովհաննիսյանը նշեց` խնդրի առնչությամբ գրավոր դիմել է ՀՀ ոստիկանապետին` աջակցելու, որ տեսախցիկները կարգապահություն սահմանեն, ոչ թե վարորդներին բացահայտորեն թալանեն: «Այժմ սպասում եմ նրա պատասխանին: Չեմ կարծում, որ ոստիկանությունը չարձագանքի նամակիս, բայց եթե պատասխան չստանանք, շարունակելու ենք մեր պայքարը»,- ասաց նա:
Ասուլիսին ներկա վարորդ Արայիկ Բեգլարյանն էլ իր հերթին դժգոհեց, որ արագության սահմանման ցուցանակները խիստ խաբուսիկ են: «Ցուցանակներ շատ դեպքերում ուղղակի չկան: Մայրուղիներում սահմանված արագությամբ վարելով` մեկ էլ տեղեկանում ես, որ որոշ տարածություն անցնելիս պետք է իջեցնեիր արագությունդ, սակայն համապատասխան ցուցանակ չտեսնելով և չիջեցնելով` տուգանվել ես: Ստացվում է` պետք է անգիր անես ճանապարհները:
Երբ պետք է գումարներ գանձեն քաղաքացիներից, հիշեցնում են միջազգային փորձի մասին, երբ պետք է կարգավորեն իրավիճակը` ոչ: Տաքսիստներից, տուգանքների ձևով, գանձում են իրենց ամսական եկամտի ամենաքիչը 20 տոկոսը»,- ասաց նա:
Լուսանկարը` PanARMENIAN Photo-ի
