Ենթադրյալ մարդասպանի հետքին դուրս գալ հաջողվել է ԴՆԹ վերլուծության նոր տեխնոլոգիաների շնորհիվ:
ԱՄՆ Ֆլորիդա նահանգում ոստիկանությունը ձերբակալել է տեղի բնակչին գրեթե 50 տարի առաջ տեղի ունեցած կնոջ դաժան սպանության գործով: Երկար տարիներ հետաքննությանը չի հաջողվել որևէ հետք գտնել: Սակայն 2007թ.-ին հետաքննությունը վերսկսվել է, երբ ոստիկանությանը հասանելի են դարձել ԴՆԹ-ի վերլուծության նոր տեխնոլոգիաները: Ձերբակալվածը 65-ամյա Լարի Ջո Սքոթն է:
News & Observer պարբերականի տվյալներով, 33-ամյա Բոնի Նեյբորսի սպանությունը տեղի է ունեցել 1972թ.-ի դեկտեմբերին, Հյուսիսային Կարոլինա նահանգում: Կինը մանկահասակ երեխան գրկին գնացել է դպրոց՝ ավագ որդուն տուն բերելու նպատակով, սակայն անհետ կորել է: Ավելի ուշ նրա մարմինը հայտնաբերվել է Բենսոն քաղաքից ոչ հեռու գտնվող միգրանտ բանվորների տանը: Երեխան ողջ է եղել:
Ջոնսթոն շրջանի շերիֆ Սթիվ Բիզելը հաղորդել է, որ տղամարդուն մեղադրանք է առաջադրվել Բոնի Նեյբորսի առևանգման և սպանության համար: Նախապատրաստվում է նրա արտահանձնումը Հյուսիսային Կարոլինա: Չնայած հետաքննությունը Սքոթի սպանության մեջ ներգրավվածության այլ ապացույց չունի, բացառությամբ ԴՆԹ-ի վերլուծության, շերիֆը վստահ է, որ ոստիկանությանը հաջողվել է բռնել մարդասպանին:
«Վերջապես ես կարողացա նրա որդուն ասել, որ նրա մայրիկի մարդասպանը հայտնաբերվել է»,- Բիզելի խոսքերը մեջբերում է պարբերականը:
Ներկայումս, ըստ շերիֆի, հաստատող թերտավորում է կատարվում:
