Վերջին երկու շաբաթը հագեցած էին միջազգային իրադարձություններով: Վենեսուելայում իրավիճակը ծայրահեղ ծանր է գնահատվում. այդ երկրի ընդդիմության առաջնորդ Խուան Կոայդոն Թվիթերում կոչ էր արել զինվորներին և ժողովրդին՝ տապալել նախագահ Նիկոլաս Մադուրոյին և ասել է, որ վենեսուելական բանակն անցել է իր կողմը: Դրան հաջորդեց ԱՄՆ պետքարտուղար Պոմպեոյի հայտարարությունը, որ Մադուրոն ծրագրել էր երեքշաբթի առավոտյան հեռանալ երկրից, սակայն ռուսական իշխանություններին հաջողվել է հակառակը համոզել. ըստ նրա՝ Մադուրոն ծրագրել էր Կուբա մեկնել: Այս առնչությամբ մի գրառում էր Թվիթերում արել էր ԱՄՆ նախագահը՝ նշելով, որ Կուբայի նկատմամբ ամենաբարձր մակարդակի պատժամիջոցներ կկիրառվեն, եթե Հավանան շարունակի օգնել Վենեսուելայի ներկայիս իշխանություններին: Առհասարակ, այս ամենի ազդեցությունը և քաղաքական հետևանքները ինչպիսի՞ն կարող են լինել տարածաշրջանի և ոչ միայն տարածաշրջանի համար:
Պատասխանելով «Առաջին լրատվական»-ի այս հարցին՝ Արտակարգ և լիազոր դեսպան, Հայ-ռուսական համալսարանի համաշխարհային քաղաքականության և միջազգային հարաբերությունների ամբրոնի վարիչ Արման Նավասարյանը, մասնավորապես, ասաց. «Երբ սկսվեց վենեսուելական այդ շարժումը, արդեն պարզ էր, որ այնտեղ ամերիկյան, ռուսական և չինական շահերն էին բախվում: Բայց բոլոր կողմերն էլ եկան այն եզրակացության, որ չի սրվելու սա, և մանավանդ ռազմական բախում չի լինելու Ռուսաստանի և Միացյալ Նահանգների միջև, որ հիմա էլ այդպես է: Վենեսուելայում տեղի է ունեցել ռազմական հեղաշրջման փորձ: Սակայն Ռուսաստանն այնտեղ, կարծեմ, 18 միլիարդի ներդրումներ ունի, 40 մլրդ ունի Չինաստանը, երկրում կա զենք… Փաստորեն, Ռուսաստանը, նաև Չինաստանը՝ ավելի թաքնված ձևով, փորձ է անում ամրապնդվել Լատինական Ամերիկայում: Դա Ամերիկայի համար մահվան հավասար մի բան է»: «Իշխանափոխություն երևի կլինի, բայց եթե այստեղ սկսվի երկրորդ (գուցե ո՛չ երկրորդ, որովհետև այնտեղ այնքա՜ն կետեր կան) Սիրիա, սա ոչ մի լավ բանի չի բերի»,- նկատեց դիվանագետը:
Մանրամասները՝ տեսանյութում։