Եգիպտոսում երեկ կրկին բախումներ են սկսվել այն բանից հետո, երբ Կահիրեի դատարանը գրավի դիմաց կալանքից ազատ է արձակել 7 ոստիկանների, որոնք մեղադրվում են այս տարվա սկզբին հակակառավարական ելույթների ժամանակ ցուցարարներին սպանելու մեջ: Այս մասին հաղորդում է BBC-ն:
Դատարանի մոտ տեղի ունեցած կռվի ժամանակ հարյուրավոր մարդիկ փակել են Սուեզի ջրանցքի կողմը տանող ճանապարհը: Քննության տվյալներով՝ ազատ արձակված ոստիկանները Սուեզում 17 մարդ են սպանել հունվարի վերջին – փետրվարի սկզբին: Դատարանը որոշում է կայացրել ազատ արձակել նրանց, իսկ դատական նիստը հետաձգել մինչև սեպտեմբեր:
Սա առաջին դեպքը չէ, երբ հեղափոխությունից հետո բախումներ են տեղի ունենում: Հիմնականում բողոքի ակցիաների են դուրս գալիս սպանվածների հարազատները, որոնք պահանջում են անհապաղ պատասխանատվության կանչել մեղավորներին:
Այսօր նաև հայտնի է դարձել, որ Եգիպտոսի ժամանակավոր իշխանությունները որոշում են կայացրել խորհրդարանական ընտրություններն անցկացնել սեպտեմբերի վերջին։ Դրան կհաջորդեն նախագահական ընտրությունները: