ԱԺ ՀՀԿ խմբակցության ղեկավար Գալուստ Սահակյանը այսօր հրավիրված ասուլիսի ընթացքում լրագրողներին առաջարկեց սուր հարցեր չտալ, քանի որ այսօր տոնական օր է: Միաժամանակ ասաց, թե վերջին շրջանում նկատել է, որ ժողովուրդը իր իրավունքների պաշտպանությունը փնտրում է Սահամանադրության մեջ:
Նրա խոսքերով, Սահմանադրությունը և՛ իրավունք է, և՛ պատասխանատվություն: Անդրադառնալով այն հարցին, թե ՀԱԿ-ը շարունակում է իր օրակարգում պահել արտահերթ ընտրությունների պահանջը, նա արձանագրեց, որ արտահերթ ընտրությունները ոչ մի երկրի և ժողովրդի լավ արդյունքների չեն հանգեցրել: Այդ թվում՝ եթե 90-ական թվականներին հհշականները չպահանջեին, մենք այսօր ավելի լավ վիճակում կլինեինք:
Դիտարկմանը, թե ՀԱԿ-ը մինչև սեպտեմբեր է ժամանակ տվել, մինչև այդ իրենք ի՞նչ են պատրաստվում անել, Սահակյանը արձագանքեց. «Վախեցած լռում ենք, տեսնենք՝ ինչ են անելու, երեք տարի է՝ ասում են, մենք էլ վախեցած սպասում ենք, ասում՝ մի փոքր էլ համբերենք»: Ինչ վերաբերում է այն հարցին, թե ինչո՞ւ է ՀԱԿ-ը կրկին անցել թաթար-մոնղոլական արտահայտություններին, ասաց, որ զանգվածը նոսրանում է, նոր զանգվածների անհրաժեշտություն կա, սակայն նույնիսկ այդ արտահայտությունները չեն կարող հաջողությունների հասնել, որովհետև ժամկետները քիչ են, ավելին` նույնիսկ ղարաբաղյան հարցում սկսել են նոր խաղեր տալ՝ ասելով, թե իշխանությունները անցել են փուլային տարբերակին:
Գ.Սահակյանի համոզմամբ՝ ՀԱԿ-ից հեռանում է ոչ միայն ժողովուրդը, այլև ղեկավարությունը: Այնուհետև Գալուստ Սահակյանը շտապեց իրեն ուղղել՝ ասելով որ ՀԱԿ-ը մեկ ղեկավար ունի՝ Լևոն Տեր-Պետրոսյանը։ Ապա ավելացրեց, թե ՀԱԿ-ն այնքան ասաց՝ իշխանությունները կազմաքանդվում են, որ իր գլխին եկավ:
Ամեն դեպքում, «երկխոսությունը կկայանա՞, թե՞ ոչ» հարցին Սահակյանը պատասխանեց. «Մենք բազմիցս ասել ենք, որ պատրաստ ենք երկխոսել թեկուզ այս ակումբում, եթե իրենց լավ պահեն՝ «Օջախ» ռեստորանում կամ՝ Սևանում հանրային լողափեր են բացվել, բայց մենք երկխոսելու ենք, ոչ թե բանակցելու»:
Ի դեպ, լրագրողների հարցին ի պատասխան, թե իր համար անակնկա՞լ էր, որ իր որդուն նշանակեցին պետգույքի ղեկավար, նշեց, թե ոչ, իր համար անակնկալ չէր, իր որդին ճանապարհ է անցել, և ներկայիս չինովնիկների մեջ նման քչերը կան, իսկ ինքն էլ նպաստավոր ջերմոցային պայմաններ ստեղծելով չի զբաղվում: