Սիրիայում զինված ընդդիմության գրոհայինները ուրբաթ ականանետային հարձակման են ենթարկել Դամասկոսի բնակելի թաղամասերը: Ինչպես հայտնում է SANA գործակալությունը, առնվազն երկու արկեր պայթել են Բեբ-Շարկի հնագույն դարպասների շրջանում: Բեկորային վնասվածքներ է ստացել 18 մարդ, այդ թվում՝ 8 կին և 5 երեխա: Երեխաներից մեկը ծանր վիճակով գտնվում է հիվանդանոցում:
Քաղաքից արևելք Հորդանանի սահմանը հատած զինված խմբավորումները փորձել են ճակատային գիծը ճեղքել Ալ-Ուտեյբա, Ադրա և Դումեյր բնակավայրերի մոտ, սակայն նրանց դիմավորել են դարանակալած սիրիացի զինվորները: Մարտում ոչնչացվել է ավելի քան 20 գրոհային:
Մեկ այլ ավազակախումբ է ոչնչացվել Դամասկոսից 12 կմ հեռավորության վրա՝ Դումա քաղաքի մոտ: Այնտեղ ոչնչացվել է 25 գրոհային:
Հաղորդվում է, որ երկրի իրավապահ մարմիններում անցկացվել են զենքը վայր դրած 350 ընդդիմադիրների ստուգումներ: Նրանք Բուկեյնից և Մադայայից են (մայրաքաղաքին մոտ գտնվող առողջարանային քաղաքներ): Պարզվել է, որ նրանք կապ չունեն ահաբեկչության հետ: Դիմակայությունը դադարեցրել և համաներման պայմաններից օգտվել են ևս 82 ապստամբներ Դարաայից:
